ఇండస్ట్రీలో ఓ సినిమాకు మరో సినిమా మార్గం ఇచ్చే సంఘటనలు తరచుగా జరుగుతూనే ఉంటాయి. బాహుబలి కోసం శ్రీమంతుడును మహేష్ బాబు వాయిదా వేసిన ఉదాహరణ అప్పట్లో పెద్ద చర్చకెక్కింది. ఇప్పుడు అలాంటి పరిస్థితే ధనుష్ ఇడ్లీ కడాయి సినిమాకు ఎదురైంది, అయితే అసలు కారణాలు మరోలా ఉన్నాయి.
ధనుష్ నటించి, దర్శకత్వం వహించిన ఇడ్లీ కడాయి ఏప్రిల్ 10న విడుదల అవుతుందని మూడు నెలల క్రితమే అధికారికంగా ప్రకటించారు. అయితే, అజిత్ ప్రధాన పాత్రలో రూపొందుతున్న గుడ్ బ్యాడ్ అగ్లీ అనూహ్యంగా అదే తేదీని లాక్ చేయడంతో, రెండు బిగ్ బడ్జెట్ సినిమాల మధ్య క్లాష్ ఏర్పడే ప్రమాదం కనిపించింది. దీంతో థియేట్రికల్ బయ్యర్లు ఒత్తిడికి గురయ్యారు.
ఈ సమస్యకు పరిష్కారం దొరికింది – ఇడ్లీ కడాయి విడుదల వాయిదా పడింది. అధికారిక ప్రకటన ఇంకా రాలేదు కానీ త్వరలోనే క్లారిటీ రానుంది. తమిళ సినీ వర్గాల్లో వినిపిస్తున్న టాక్ ప్రకారం, అజిత్, ధనుష్ దర్శకత్వంలో ఓ సినిమా చేయడానికి ముందే అంగీకారం తెలిపాడు, అందుకే ఈ అడ్జస్ట్మెంట్ జరిగిందని అంటున్నారు. కానీ వాస్తవాలు వేరు.
ఇడ్లీ కడాయి షూటింగ్ ఇప్పటికీ పూర్తి కాలేదు. ఇంకా కొంత టాకీ పార్ట్, విదేశాల్లో చిత్రీకరించాల్సిన ఒక పాట బ్యాలెన్స్ ఉంది. అలాగే పోస్ట్ ప్రొడక్షన్కు ఎక్కువ సమయం కావాలి. మరోవైపు, ఇటీవల విడుదలైన జాబిలమ్మ నీకు అంత కోపమా సినిమాతో దొరికిన బ్రేక్ తర్వాత ధనుష్ బాలీవుడ్ మూవీ తేరి మేరీ ఇష్క్ సెట్స్లో బిజీ అయిపోయాడు. ఈ కారణంగా ఏప్రిల్ 10కి సినిమా సిద్ధం చేయడం కష్టమైపోయింది.
అజిత్ సినిమా కోసం త్యాగం చేయడం లాంటి అంశాలేమీ లేవని కోలీవుడ్ వర్గాలు స్పష్టం చేస్తున్నాయి. అయితే, గుడ్ బ్యాడ్ అగ్లీ మీద ట్రైలర్ విడుదల తర్వాత భారీ బజ్ ఏర్పడింది. మైత్రి మూవీ మేకర్స్ ఈ సినిమాకు గ్రాండ్ రిలీజ్ ప్లాన్ చేస్తుండడంతో, దీనికి పోటీ ఇవ్వకపోవడమే ఉత్తమమనే అభిప్రాయానికి నిర్మాతలు వచ్చారని అంటున్నారు.
ఇదిలా ఉంటే, ఇడ్లీ కడాయి తాజా ప్లానింగ్ ప్రకారం జూలై లేదా ఆగస్ట్లో విడుదలకు అవకాశాలు ఎక్కువగా కనిపిస్తున్నాయి. త్వరలోనే దీనిపై అధికారిక ప్రకటన వచ్చే అవకాశం ఉంది.
Recent Random Post:
