టాలీవుడ్లో క్వాలిటీ సినిమాలు చేస్తూనే మంచి స్పీడ్ కూడా చూపించే హీరోల్లో నేచురల్ స్టార్ నాని పేరు ముందు వరుసలో ఉంటుంది. ఒకప్పుడు కేవలం క్లాస్ టచ్ ఉన్న సినిమాలే చేసిన నాని, ఆ తర్వాత మాస్ సినిమాలు చేసి ఆ వర్గంలోనూ ఆదరణ సంపాదించుకున్నాడు. సినిమా సినిమాకూ తన మార్కెట్ విస్తరిస్తూ, వరుస హిట్లతో ప్రేక్షకులను ఆకట్టుకుంటున్నాడు. దసరా, హాయ్ నాన్న, సరిపోదా శనివారం చిత్రాలతో హ్యాట్రిక్ విజయాన్ని అందుకున్న నాని, ప్రస్తుతం హిట్-3 లాంటి క్రేజీ ప్రాజెక్టులో నటిస్తున్న సంగతి తెలిసిందే. ఈ చిత్రం వేసవిలో ప్రేక్షకుల ముందుకు రానుంది.
త్వరలోనే అతను దసరా దర్శకుడు శ్రీకాంత్ ఓదెలతో ప్యారడైజ్ అనే చిత్రాన్ని ప్రారంభించబోతున్నాడు. సినిమాలు చేస్తూనే, కొత్త కథలు విని భవిష్యత్ ప్రాజెక్టులను లైన్లో పెడుతూ ముందుకెళ్తున్న నాని, ఇప్పుడు ఒక డ్రీమ్ కాంబినేషన్లో సినిమాకు రెడీ అవుతున్నట్లు వార్తలు వస్తున్నాయి. తెలుగులో అరుదైన దర్శకుల్లో ఒకడిగా పేరున్న శేఖర్ కమ్ములతో నాని జట్టు కట్టబోతున్నాడన్నది తాజా సమాచారం. నాని ఫిల్మోగ్రఫీని పరిశీలిస్తే, శేఖర్ కమ్ముల అతడికి పూర్తిగా సరిపోతారని చెప్పొచ్చు. వీరి కలయికలో సినిమా వస్తే బాగుంటుందని అభిమానులు ఎప్పటి నుంచో ఎదురు చూస్తున్నారు. కానీ ఇప్పటివరకు అది సాకారమవ్వలేదు.
శేఖర్ కమ్ముల స్పీడుగా సినిమాలు చేసే రకం కాదు. ఆయన సినిమాకు సినిమాకు మధ్య చాలా గ్యాప్ ఉంటుంది. మేకింగ్ టైమ్ ఎక్కువ తీసుకునే దర్శకుల్లో ఒకరు. ప్రస్తుతం ధనుష్తో కుబేర అనే చిత్రాన్ని తెరకెక్కిస్తున్న కమ్ముల, దాని చివరి దశ పనులను పూర్తి చేస్తున్నాడు. ఈ సినిమా వేసవిలో విడుదల కానుంది. అదే సమయానికి నాని కూడా తన ప్యారడైజ్ ప్రాజెక్టును పూర్తి చేయబోతున్నాడు. అప్పుడు వీరిద్దరి కాంబినేషన్లో సినిమా పట్టాలెక్కే అవకాశం ఉంది. అన్నీ కుదిరితే ఈ ఏడాది చివర్లోనే అధికారిక ప్రకటన వెలువడే సూచనలు కనిపిస్తున్నాయి.
Recent Random Post:
