బెల్లంకొండ సాయి శ్రీనివాస్, మంచు మనోజ్, నారా రోహిత్ ముఖ్య పాత్రల్లో నటించిన “భైరవం”, విజయ్ కనకమేడల దర్శకత్వంలో మే 30న ప్రేక్షకుల ముందుకు రానుంది. విడుదల సమీపిస్తుండటంతో చిత్ర బృందం ప్రమోషన్ల స్పీడు పెంచింది. ఈ సందర్భంగా మీడియాతో మాట్లాడిన బెల్లంకొండ శ్రీనివాస్ తన కెరీర్కు సంబంధించిన ఆసక్తికర విషయాలు పంచుకున్నారు.
బాలీవుడ్ ప్రయాణం గురించి చెప్పిన శ్రీనివాస్, “యాక్టర్ అయ్యే ముందు ముంబయిలో కొంతకాలం ట్రైనింగ్ తీసుకున్నాను. ఆ తర్వాత అక్కడి బడా నిర్మాణ సంస్థ నుంచి మూడు సినిమాల ఆఫర్ వచ్చింది. మొదటిసారిగా పెద్దగా ఆసక్తి చూపలేకపోయినా, తండ్రి సలహా మేరకు ఆ అవకాశాలను స్వీకరించాను. 2019లోనే ‘ఛత్రపతి’ సినిమాకు సైన్ చేశాను,” అని తెలిపారు.
తెలుగు నటులలో బాలీవుడ్లో అడుగుపెట్టిన వారు చాలా తక్కువమంది అని పేర్కొన్న ఆయన, “రామ్ చరణ్ చేసిన ‘జంజీర్’ కూడా ఓ రీమేక్ సినిమా. హిందీలోనే హిందీ సినిమా చేయడం వల్ల అది వర్కవుట్ కాలేదు. కానీ ‘ఛత్రపతి’ రాజమౌళి గారి సౌత్ హిట్ కాబట్టి వర్కవుట్ అవుతుందన్న నమ్మకంతో నిర్మాత ఒప్పించాడు. కానీ షూటింగ్ సమయంలోనే ఈ సినిమా నడుస్తుందా? వద్దా? అనే డైలెమాలో ఉండిపోయాను. అందుకే పూర్తిగా కట్టుబడి పని చేయలేకపోయాను,” అని నిజాయితీగా చెప్పారు.
అలాగే, “ప్రతి సినిమా మనకు ఏదో ఒక పాఠం నేర్పుతుంది. భవిష్యత్తులో ప్రభాస్ నటించిన సినిమాను కూడా రీమేక్ చేస్తాను. అలాగే తమిళ నటుడు సూరి సినిమాలో కూడా చేయాలనుంది. ఇది నా స్టైల్. అజయ్ దేవగణ్, అక్షయ్ కుమార్ లాంటి వారు అన్ని రకాల పాత్రలు పోషిస్తారు. నాకూ అలాంటి విలువైన ఇమేజ్ రావాలి. నన్ను చూసి ‘ఏ పాత్రైనా బాగానే చేస్తాడు’ అనే అభిప్రాయం కలుగాలని నా ప్రయత్నం,” అంటూ తన అభిలాషను వ్యక్తపరిచారు శ్రీనివాస్.
Recent Random Post:
