యాక్షన్ కింగ్ అర్జున్ మరోసారి దర్శకుడిగా వెండితెరపై మ్యాజిక్ చేయడానికి సిద్ధమయ్యారు. సుదీర్ఘ విరామం తర్వాత ఆయన దర్శకత్వంలో తెరకెక్కిన చిత్రం ‘సీతాపయనం’ ప్రస్తుతం సినీ వర్గాల్లో హాట్ టాపిక్గా మారింది. ముఖ్యంగా తన కుమార్తె ఐశ్వర్య అర్జున్ కెరీర్ కోసం తండ్రిగా ఆయన చూపిస్తున్న అంకితభావం, ఈ కథకు మెగాస్టార్ చిరంజీవి అందించిన ప్రోత్సాహం సినిమాపై అంచనాలను మరింత పెంచుతున్నాయి. వాలెంటైన్స్ డే కానుకగా ఈ చిత్రం ఫిబ్రవరి 14న విడుదల కానుంది.
‘సీతాపయనం’ కథ గురించి అర్జున్ ఇటీవల మాట్లాడుతూ పలు ఆసక్తికర విషయాలను వెల్లడించారు. ఈ కథ మెగాస్టార్ చిరంజీవికి ఎంతో నచ్చిందని, కథ మొత్తం ఆయనకు పూర్తిగా తెలుసని అర్జున్ తెలిపారు. కథలోని బలమైన అంశాలను గమనించిన చిరంజీవి, ఇందులోని ఒక కీలక పాత్రకు అద్భుతమైన నటుడిని ఎంపిక చేయాలని ప్రత్యేకంగా సూచించారట. ఆ సలహా మేరకు అర్జున్ ముందుగా మక్కల్ సెల్వన్ విజయ్ సేతుపతిని సంప్రదించారు. అయితే డేట్స్ కుదరకపోవడంతో విజయ్ సేతుపతి ఈ ప్రాజెక్ట్లో భాగం కాలేకపోయారు.
దీంతో ఆ పాత్రలో కొన్ని మార్పులు చేసి, చివరకు తన కుమార్తె కోసం తానే ఆ కీలక పాత్రను పోషించాలని అర్జున్ నిర్ణయించుకున్నారు. ఒక దర్శకుడిగా మాత్రమే కాకుండా, ఒక బాధ్యతాయుతమైన తండ్రిగా ఐశ్వర్య అర్జున్ కెరీర్ను సరైన దారిలో నడిపించాలనే ఉద్దేశంతో ఈ ప్రాజెక్ట్ను ఆయన ఎంతో ప్రతిష్టాత్మకంగా తీసుకున్నారు.
నిరంజన్, ఐశ్వర్య అర్జున్ ప్రధాన పాత్రల్లో నటిస్తున్న ఈ సినిమాను ప్రతి ఫ్రేమ్ను ఎంతో ప్యాషన్తో తెరకెక్కించారు. కుమార్తెను వెండితెరపై పవర్ఫుల్ పాత్రలో చూపించాలనే లక్ష్యంతో స్క్రిప్ట్ విషయంలో ఎక్కడా రాజీ పడలేదని తెలుస్తోంది. మొదట విజయ్ సేతుపతి చేయాల్సిన ఆ బలమైన పాత్రను అర్జున్ స్వయంగా పోషించడంతో సినిమాకు మరింత క్రేజ్ వచ్చిందని టాక్.
తన అనుభవాన్ని, తన కెరీర్ను మొత్తం రంగరించి కుమార్తె కోసం రూపొందించిన ‘సీతాపయనం’ ఐశ్వర్య అర్జున్ కెరీర్లో ఒక మైలురాయిగా నిలుస్తుందని యాక్షన్ కింగ్ ధీమా వ్యక్తం చేస్తున్నారు. వాలెంటైన్స్ డే సందర్భంగా విడుదలవుతున్న ఈ చిత్రం కేవలం ఒక ప్రేమకథ మాత్రమే కాకుండా, అర్జున్ మార్క్ ఎమోషన్స్తో కూడిన బలమైన డ్రామాగా ప్రేక్షకుల ముందుకు రాబోతోంది.
మెగాస్టార్ చిరంజీవి మెచ్చిన కథ కావడం, యాక్షన్ కింగ్ మళ్లీ మెగాఫోన్ పట్టడం సినిమాపై క్యూరియాసిటీని పెంచుతోంది. తన కుమార్తెను సక్సెస్ఫుల్ హీరోయిన్గా చూడాలనే అర్జున్ కల ఎంతవరకు ఫలిస్తుందో తెలుసుకోవాలంటే ఫిబ్రవరి 14 వరకు వేచి చూడాల్సిందే. యాక్షన్ కింగ్ దర్శకత్వంలో వస్తున్న ఈ ప్రయాణం బాక్సాఫీస్ వద్ద విజయం సాధించాలని అభిమానులు ఆశిస్తున్నారు.
Recent Random Post:
