స్టార్ సింగర్ చిన్మయి తరచూ సామాజిక అంశాలపై తన అభిప్రాయాలను బహిరంగంగా వ్యక్తం చేస్తూ వార్తల్లో నిలుస్తూ ఉంటారు. తాజాగా జమ్ముకశ్మీర్లోని పహల్గాం ఉగ్రదాడిపై దేశమంతటా స్పందనలు వెల్లువెత్తుతుండగా, చిన్మయి ఇన్స్టాగ్రామ్లో పెట్టిన ఒక పోస్ట్ సోషల్ మీడియాలో వైరల్ అయ్యింది.
ఆమె తన వ్యక్తిగత అనుభవాలను పంచుకుంటూ, “కులాన్ని ఆధారంగా చేసుకుని తక్కువ చేయడం కూడా ఒక ఉగ్రవాద చర్యే” అని తీవ్రంగా విమర్శించారు. “నేను షెడ్యూల్డ్ తెగకు చెందినవాళిని. చాలా మంది హిందువులు నేను వారిలో ఒకరినని మర్చిపోయారు. మా ఊరిలో గుడికి వెళ్తే పూజారి నాతో ప్రసాదం పంచుకోలేదు. అది నేను చిన్నప్పటి నుంచే ఎదుర్కొంటున్న దురదృష్టం” అని చెప్పారు.
“కాలేజీ రోజుల్లోనూ నేను కులవివక్షను ఎదుర్కొన్నాను. రిజర్వేషన్లపై కూడా ఎన్నో విమర్శలు వినాల్సి వచ్చింది. అయినా నేను తలవంచలేదు. కానీ కొన్ని సందర్భాల్లో ఆ అవమానాలు ఎంతో బాధించాయి. అగ్రవర్ణాల ఆధిపత్యం చూపుతూ మానసికంగా హింసించడం కూడా ఉగ్రవాదంతో సమానమే” అని పేర్కొన్నారు.
“ఈ వివక్ష వల్ల నా మానసిక ఆరోగ్యం దెబ్బతింది. కానీ ఇప్పటి వరకు కుల వివక్షపై సరైన స్థాయిలో సినిమాలు రాలేదు. మత ఆధారంగా హత్యలు జరిగిపోతుంటే, ఆధిపత్యం ఆధారంగా మానసిక హత్యలు జరుగుతున్నాయి” అంటూ తన అభిప్రాయాన్ని చిన్మయి బలంగా వ్యక్తం చేశారు.
ఈ పోస్ట్ నెటిజన్లలో తీవ్ర చర్చకు దారి తీసింది. కొందరు ఆమె ధైర్యాన్ని ప్రశంసిస్తుండగా, మరికొందరు ఆమెపై విమర్శలు చేస్తున్నారు. ప్రస్తుతం చిన్మయి పోస్ట్ సోషల్ మీడియాలో హాట్ టాపిక్గా మారింది.
Recent Random Post:
