బాలీవుడ్ సూపర్ స్టార్ హృతిక్ రోషన్, టాలీవుడ్ యంగ్ టైగర్ ఎన్టీఆర్ కలిసి నటిస్తున్న వార్ 2 పై అంచనాలు రోజు రోజుకు ఆకాశాన్ని తాకుతున్నాయి. ఎన్టీఆర్ తొలి హిందీ సినిమా కావడమే కాక, యశ్ రాజ్ ఫిలిమ్స్ అత్యంత ప్రతిష్ఠాత్మకంగా రూపొందిస్తున్న స్పై థ్రిల్లర్ కావడంతో అన్ని వర్గాల ప్రేక్షకుల్లో భారీ ఉత్కంఠ నెలకొంది. ఇటీవల విడుదలైన టీజర్ కొంత మేర సినిమాపై ఉన్న హైప్ను తగ్గించినా, మేకర్స్ తిరిగి ప్రమోషన్ల ద్వారా సినిమా క్రేజ్ను పెంచుతున్నారు.
తాజాగా బాలీవుడ్ దర్శక నిర్మాత కరణ్ జోహార్ వ్యాఖ్యలు ఈ సినిమా పై హైప్ను మరింత పెంచేశాయి. ఓ ఇంటర్వ్యూలో కరణ్ మాట్లాడుతూ, “ఒక బాలీవుడ్ స్టార్, ఒక సౌత్ స్టార్ కలిసి నటించడం నిజంగా అరుదైన సంగతి. దేశవ్యాప్తంగా ప్రేక్షకులు ఈ కాంబినేషన్ కోసం ఆసక్తిగా ఎదురుచూస్తున్నారు. ఈ ఏడాది అత్యంత భారీ ప్రాజెక్ట్లలో వార్ 2 ఒకటిగా నిలుస్తుంది” అని పేర్కొన్నారు.
హృతిక్ రోషన్ సినిమాలంటే బాలీవుడ్లో సగటు ప్రేక్షకుడిలోనే భారీ అంచనాలు ఉంటాయి. ఇప్పుడు ఎన్టీఆర్ వంటి పాన్ ఇండియా స్టార్ కలవడంతో అంచనాలు రెట్టింపు అయ్యాయి. ‘ఆర్ఆర్ఆర్’ సినిమా ద్వారా ఎన్టీఆర్ ఇప్పటికే నార్త్ ఆడియన్స్ను ఆకట్టుకున్నాడు. ఇప్పుడు వార్ 2 లోని యాక్షన్, పర్ఫార్మెన్స్తో తన అభిమాన వర్గాన్ని మరింత విస్తరించే అవకాశం ఉందని సినీ వర్గాలు చెబుతున్నాయి.
ఈ సినిమా స్పై థ్రిల్లర్ జానర్లో బాలీవుడ్ నుండి వస్తున్న మరో భారీ ప్రాజెక్ట్గా పరిగణిస్తున్నారు. గత కొంతకాలంగా స్పై థ్రిల్లర్ జానర్లో మళ్లీ క్రేజ్ తగ్గుతుందన్న మాటలు వినిపిస్తున్నా, హృతిక్-ఎన్టీఆర్ కాంబో మాత్రం భారీ హైప్ను సృష్టించింది. షూటింగ్ దాదాపు పూర్తయింది. కేవలం ఒక పాట మాత్రమే మిగిలి ఉంది. ఆగస్టులో విడుదలకు సన్నాహాలు జరుగుతున్నాయి.
ఈ సినిమాను కొన్ని ఏరియాల్లో దిల్ రాజు డిస్ట్రిబ్యూట్ చేయనుండగా, మిగతా ఏరియాల్లో యశ్ రాజ్ ఫిలిమ్స్ స్వయంగా పంపిణీ చేస్తుందనే సమాచారం. హృతిక్ రోషన్కు జోడీగా కియారా అద్వానీ నటిస్తుండగా, డైరెక్టర్ అయాన్ ముఖర్జీ భారీ స్థాయిలో ఈ చిత్రాన్ని తెరకెక్కిస్తున్నారు. చివరగా కరణ్ జోహార్ అభిప్రాయం ప్రకారం, వార్ 2 వందల కోట్ల వసూళ్లు కొల్లగొట్టడం ఖాయం అన్న ధీమా సినీ వర్గాల్లో నెలకొంది.
Recent Random Post:
