పవర్ స్టార్ పవన్ కళ్యాణ్ నటిస్తున్న మోస్ట్ అవైటెడ్ చిత్రం OG పై అంచనాలు రోజురోజుకీ పెరిగిపోతున్నాయి. సుజీత్ దర్శకత్వం వహిస్తున్న ఈ గ్యాంగ్స్టర్ యాక్షన్ థ్రిల్లర్ ఇప్పటికే విడుదలైన టీజర్, మేకింగ్ వీడియోలతో సినీ ప్రియులలో మంచి బజ్ క్రియేట్ చేసింది. పవన్ మాస్ స్టైల్, పవర్ఫుల్ డైలాగ్ డెలివరీ, యాక్షన్ సీన్లకు ఉన్న ఆదరణ ఈ సినిమాపై ప్రేక్షకులతో పాటు ట్రేడ్ వర్గాల్లోనూ భారీ ఆసక్తిని తీసుకువచ్చింది.
ఈ సినిమాకు థమన్ సంగీతం అందిస్తుండగా, బాలీవుడ్ నటుడు ఇమ్రాన్ హష్మీ విలన్గా తెలుగు తెరపై తన అరంగేట్రం చేయబోతున్నాడు. ప్రియాంక మోహన్ హీరోయిన్గా నటిస్తోంది. OG సినిమాను భారీ బడ్జెట్తో RRR నిర్మాత దానయ్య నిర్మిస్తున్నారు. ఈ కాంబినేషన్కి ఉన్న క్రేజ్ కారణంగా సినిమా విడుదలకు ముందే థియేట్రికల్ రైట్స్ హాట్ టాపిక్గా మారాయి.
అందుతున్న సమాచారం ప్రకారం, ఇప్పటికే ఆంధ్రప్రదేశ్లో OG సినిమా బిజినెస్ చురుగ్గా సాగుతోంది. విశాఖపట్నం ఏరియా థియేట్రికల్ హక్కులు రూ. 21.80 కోట్ల భారీ ధరకు డీల్ అయినట్టు సమాచారం. సాధారణంగా ఆంధ్రా మొత్తంలో విశాఖ వాటా 24%గా ఉంటే రూ. 19 కోట్ల పరిధిలో ఉండాలి. అయితే OG సినిమాకు ఉన్న మాస్ క్రేజ్ కారణంగా ఇది 26–27% వరకు పెరిగిందని ట్రేడ్ టాక్. ఇది పవన్ మార్కెట్ స్థాయిని స్పష్టంగా చాటుతోంది.
అలానే, ఈస్ట్ గోదావరి ఏరియా హక్కులను జనసేన ఎంపీ ఉదయ్, ఆయన సన్నిహితులు కలిసి పొందినట్టు వార్తలు వస్తున్నాయి. సాధారణంగా ఈస్ట్ రేటు 16% ఉంటే, OG కోసం ఇది 18% వరకూ పెరిగినట్టు సమాచారం. గుంటూరు డిస్ట్రిక్ట్ రైట్స్ను ఆస్ట్రేలియా వెంకట్ భారీ మొత్తానికి సొంతం చేసుకున్నారన్న వార్తలు కూడా వినిపిస్తున్నాయి. మరోవైపు, ఉత్తరాంధ్ర రైట్స్ను వీరాంజనేయ ఫిలింస్ (జగ్గంపేట) వారు శ్రీదత్త కార్తికేయ ఫిలింస్తో కలిసి సుమారు రూ. 19.20 కోట్లకు కొనుగోలు చేసినట్టు తెలుస్తోంది.
ఈ మొత్తం లెక్కల ప్రకారం చూస్తే, OG సినిమా థియేట్రికల్ ప్రీ రిలీజ్ బిజినెస్ ఇప్పటికే దాదాపు రూ. 150 కోట్ల మార్క్కి చేరుకుందని అంచనాలు వెలువడుతున్నాయి. సినిమా రిలీజ్కి ఇంకా చాలా టైం ఉన్నా, ఇప్పుడే ఈ స్థాయిలో హైప్ వచ్చిందంటే పవన్ కళ్యాణ్ మార్కెట్ ఎంత బలంగా ఉందో మరోసారి రుజువైంది. విడుదల సమయానికి ఈ రేంజ్ మరింత పెరిగే అవకాశం స్పష్టంగా కనిపిస్తోంది.
Recent Random Post:
