టాలీవుడ్‌లో ఒక వెలుగు వెలిగి, ఆ తర్వాత బాలీవుడ్‌కు షిఫ్ట్ అయిన హీరోయిన్ రకుల్ ప్రీత్ సింగ్ తాజాగా తన కెరీర్ ప్రారంభ దశలో ఎదుర్కొన్న చేదు అనుభవాలను ఓ ఇంటర్వ్యూలో ఓపెన్‌గా పంచుకున్నారు. ఆమె మాటలతో నెపోటిజం అంశం మరోసారి చర్చకు వచ్చింది. ముఖ్యంగా సినిమా బ్యాక్‌గ్రౌండ్ లేని ఔట్‌సైడర్స్ ఎదుర్కొనే ఇబ్బందులు మరోసారి వెలుగులోకి వచ్చాయి.

బాలీవుడ్‌కు కొత్తగా అడుగుపెట్టిన రోజుల్లో తనకు ఎవరూ పరిచయం లేకపోయిందని రకుల్ చెప్పారు. క్యాస్టింగ్ డైరెక్టర్లకు ఫోన్ చేస్తే చాలా సందర్భాల్లో వారు కాల్ కూడా లిఫ్ట్ చేయరని, ఎప్పుడైనా ఎత్తితే నిర్లక్ష్యంగా మాట్లాడేవారని ఆవేదన వ్యక్తం చేశారు. ఒక చిన్న ఆడిషన్ కోసం లేదా అవకాశానికి ఆఫీసుల చుట్టూ తిరగడం, గంటల తరబడి వేచి ఉండడం తన మానసిక ధైర్యాన్ని తీవ్రంగా పరీక్షించిందన్నారు.

“మనం బయటి వాళ్లం కాబట్టి రెడ్ కార్పెట్ వెల్‌కమ్ ఉండదు. ప్రతి అడుగులో మనల్ని మనమే నిరూపించుకోవాల్సి ఉంటుంది” అని రకుల్ పేర్కొన్నారు. తెలుగులో టాప్ హీరోయిన్‌గా గుర్తింపు ఉన్నప్పటికీ, బాలీవుడ్‌లో మాత్రం తనను పూర్తిగా కొత్త నటిగానే చూశారని చెప్పారు. దక్షిణాదిలో తాను స్టార్ అన్న విషయం వారికి తెలిసినా, హిందీ మార్కెట్ లెక్కలు వేరు కావడంతో మళ్లీ సున్నా నుంచి మొదలుపెట్టాల్సి వచ్చిందని తెలిపారు.

అయితే, నిర్మాత-నటుడు జాకీ భగ్నానీని వివాహం చేసుకున్న తర్వాత తన జీవితంలో కొంత స్థిరత్వం వచ్చిందని కూడా రకుల్ చెప్పకనే చెప్పింది. భగ్నానీ కుటుంబానికి ఉన్న పరిచయాలతో బాలీవుడ్‌లో అవకాశాల పరంగా ఇబ్బందులు తగ్గాయని ఇండస్ట్రీ వర్గాలు భావిస్తున్నాయి. దే దే ప్యార్ దే, రన్‌వే 34, డాక్టర్ జీ వంటి చిత్రాలతో రకుల్ బాలీవుడ్‌లో తనకంటూ ఓ గుర్తింపు తెచ్చుకున్నారు.

2024లో జాకీ భగ్నానీని వివాహం చేసుకున్న తర్వాత రకుల్ కెరీర్ ఎంపికల్లో మరింత జాగ్రత్తగా ముందుకు వెళ్తున్నారు. బ్యాక్‌గ్రౌండ్ లేకపోయినా పట్టుదలతో కష్టపడితే బాలీవుడ్ లాంటి కఠినమైన ఇండస్ట్రీలోనూ స్థానం సంపాదించుకోవచ్చని ఆమె ప్రయాణం చాలా మంది యువ నటీనటులకు స్ఫూర్తిగా నిలుస్తోంది.

టాలీవుడ్‌లో రకుల్ యువ హీరోలతో పాటు సీనియర్ హీరోల సరసన కూడా నటించారు. వెంకటాద్రి ఎక్స్‌ప్రెస్, ధృవ వంటి హిట్ సినిమాలు ఆమె ఖాతాలో ఉన్నాయి. తమిళంలో కూడా స్టార్ హీరోయిన్‌గా కొనసాగిన రకుల్, చివరిసారిగా భారతీయుడు 2లో కనిపించారు. ఇప్పుడు మళ్లీ స్ట్రెయిట్ తెలుగు సినిమాలు చేయాలని అభిమానులు కోరుకుంటున్నారు. ప్రస్తుతం ఆమె పతి పత్ని ఔర్ వో చిత్రంలో నటిస్తోంది. అలాగే దర్శకుడు శంకర్ నుంచి *ఇండియన్ 3 (భారతీయుడు 3)*పై అధికారిక అప్‌డేట్ రావాల్సి ఉంది.