రష్మిక మందన్న, దీక్షిత్ శెట్టి జంటగా నటిస్తున్న “ది గర్ల్‌ఫ్రెండ్” సినిమా విడుదల తేదీ దగ్గర పడుతున్నకొద్దీ ప్రేక్షకుల్లో ఆసక్తి మరింత పెరుగుతోంది. నవంబర్ 7న గ్రాండ్‌గా థియేటర్లలో విడుదల కాబోతున్న ఈ చిత్రానికి రాహుల్ రవీంద్రన్ దర్శకత్వం వహిస్తున్నారు. రీసెంట్‌గా రిలీజ్ అయిన ట్రైలర్‌లో రొమాంటిక్ లవ్ స్టోరీకి తోడు డార్క్, ఇంటెన్స్ ఎమోషన్ కనిపించడంతో మూవీపై క్యూరియాసిటీ మరింత పెరిగింది.

దీనిపై దర్శకుడు రాహుల్ రవీంద్రన్ ఆసక్తికరమైన విషయాలు వెల్లడించారు. “ట్రైలర్ ద్వారా ఆడియెన్స్‌ను కొంత మిస్ డైరెక్ట్ చేశాం. అసలు కథ వేరే డైరెక్షన్‌లో ఉంటుంది. ట్రైలర్‌లో మీరు చూసిన ఆ ఇంటెన్స్ డ్రామా సెకండాఫ్‌లో ఉంటుంది, అది ప్రేక్షకులకు నిజమైన సర్ప్రైజ్ అవుతుంది,” అని ఆయన అన్నారు.

అలాగే ఈ కథకు తన కాలేజీ రోజులలో చూసిన ఒక సంఘటన, అలాగే ఒక పాట ప్రేరణగా నిలిచాయని రాహుల్ తెలిపారు. “ఇది ఒక ప్రేమ జంట జీవితంలో జరిగిన వాస్తవ సంఘటనలకు దగ్గరగా ఉంటుంది. కానీ ఇందులో ఎలాంటి నీతులు లేదా సందేశాలు లేవు. ఇది కేవలం మనసుని తాకే ఎమోషనల్ జర్నీ మాత్రమే,” అని చెప్పారు.

మొదట ఈ ప్రాజెక్ట్‌ను ‘ఆహా’ ఓటీటీలో చేయాలనుకున్నా, కథ విన్న గీతా ఆర్ట్స్ అధినేత అల్లు అరవింద్ గారు, “ఇది ఓటీటీకి కాదు, థియేటర్లో చూడదగిన సినిమా,” అని చెప్పడంతో సినిమా థియేట్రికల్ ప్రాజెక్ట్‌గా మారిందని తెలిపారు.

రష్మిక స్క్రిప్ట్‌ చదివిన రెండు రోజుల్లోనే ఫోన్ చేసి, “ఈ కథ ఒక అమ్మాయిగా నాకు చాలా కనెక్ట్ అయింది. ఇది అన్ని అమ్మాయిలకు నేను ఇస్తున్న బిగ్ హగ్‌లాంటిది,” అని చెప్పి వెంటనే ఒప్పుకుందని రాహుల్ చెప్పారు.

సమంత ఇచ్చిన సలహా గురించి కూడా ఆయన షేర్ చేశారు — “నేను ఈ కథను సమంతకు చూపించాను. ఆమె చదివి, ఈ పాత్ర కొత్త హీరోయిన్ చేయడం బాగుంటుందని సూచించింది. ఆ సలహా నాకు చాలా హెల్ప్ అయింది,” అని చెప్పారు.

‘యానిమల్’ సినిమా సమయంలో రష్మిక ఇచ్చిన సపోర్ట్‌ గురించి కూడా ఆయన ప్రస్తావించారు. “యానిమల్ వందల కోట్ల వసూళ్లు సాధిస్తుంటే, నా సినిమా చిన్నదిగా అనిపించింది. కానీ రష్మికే నాకు ధైర్యం చెప్పింది. ‘ది గర్ల్‌ఫ్రెండ్’ నిజాయితీగా ఉండాలి, రియల్‌గా ఫీల్ అయ్యేలా చేయాలి అని ప్రోత్సహించింది,” అని రాహుల్ రవీంద్రన్ చెప్పారు.

తల్లిదండ్రులు సాధించలేనిది పిల్లలు సాధిస్తే దానికంటే గొప్ప గర్వం మరొకటి ఉండదు. చాలా మంది తల్లిదండ్రులు తమ కలలను పిల్లల రూపంలో నెరవేర్చాలని ఆశపడతారు. తాజాగా మంజుల ఘట్టమనేని కూడా అలాంటి అదృష్ట తల్లుల జాబితాలో చేరబోతున్నారు. ఎందుకంటే ఆమె కుమార్తె, సూపర్‌స్టార్ మహేష్ బాబుకు మేనకోడలు జాన్వీ ఇప్పుడు హీరోయిన్‌గా వెండితెరపై అడుగుపెడుతోంది.

ఇప్పటికే పది ఏళ్ల వయసులోనే మంజుల తన కూతురిని ‘మనసుకు నచ్చింది’ అనే సినిమాలో చిన్నపాత్రలో పరిచయం చేశారు. కానీ ఆ సమయంలో చదువుపై దృష్టి పెట్టాలని నిర్ణయించి సినిమాలు ఆపేశారు. అయినప్పటికీ ఆ అనుభవమే జాన్వీలో నటనపై ఆసక్తి పెంచింది. ఇప్పుడు పెద్దయ్యాక అదే కలను నిజం చేసుకునేందుకు జాన్వీ సన్నద్ధమవుతోంది.

మంజుల సినీ పరిశ్రమలోకి నిర్మాతగా 1990లో ప్రవేశించి, పలు సినిమాలు నిర్మించారు. తరువాత నటిగా ‘షో’ చిత్రంతో టాలీవుడ్‌లో గుర్తింపు తెచ్చుకున్నారు. ‘కావ్యాస్ డైరీ’, ‘ఆరెంజ్’, ‘సేవకుడు’, ‘మళ్లీ మొదలైంది’, ‘మంత్ ఆఫ్ మధు’ వంటి సినిమాల్లో కూడా ఆమె నటించారు. అయినప్పటికీ హీరోయిన్‌గా పెద్ద స్థాయిలో నిలబడలేకపోయారు.

అయితే ఇప్పుడు తన కలను తన కుమార్తె జాన్వీ రూపంలో నెరవేర్చుకోబోతున్నారు మంజుల. జాన్వీ చిన్నతనం నుంచే నటన, నృత్యం వంటి వాటిపై శిక్షణ పొందింది. తల్లి మార్గదర్శకత్వంలో వెండితెరపై మెరిపించడానికి సిద్ధమవుతోంది. మొత్తానికి, తల్లి సాధించలేని కలను కూతురు నెరవేర్చబోతుందన్న వార్త ఇప్పుడు టాలీవుడ్‌లో హాట్ టాపిక్‌గా మారింది.