తెలుగు చలనచిత్ర పరిశ్రమలో అక్కినేని కుటుంబానికి ప్రత్యేకమైన స్థానం ఉంది. తెలుగు సినిమాకు మూలస్తంభాలుగా నిలిచిన మహానటుడు అక్కినేని నాగేశ్వరరావు (ఏఎన్ఆర్) ఎన్టీఆర్ కంటే ముందే ఇండస్ట్రీలో అడుగుపెట్టి, తన సహజ నటనతో కోట్లాది ప్రేక్షకుల హృదయాలను గెలుచుకున్నారు. అప్పట్లోనే “అమ్మాయిల కలల రాకుమారుడు”గా గుర్తింపు పొందిన ఏఎన్ఆర్, తన లెగసీని కొనసాగించేందుకు తన కుమారుడు నాగార్జునను సినీ రంగానికి పరిచయం చేశారు.
తండ్రి సినీ వారసత్వాన్ని సమర్థంగా ముందుకు తీసుకెళ్తున్న నాగార్జున ఇప్పటికీ నటుడిగా బిజీగా కొనసాగుతున్నారు. ఈ క్రమంలోనే తాజాగా జరిగిన ఒక కార్యక్రమంలో ఆయన చేసిన పని అందరి దృష్టిని ఆకర్షించింది. గుడివాడలోని ఏఎన్ఆర్ కాలేజీకి నాగార్జున రూ.2 కోట్ల విరాళం ప్రకటించి, తన తండ్రిలాగే గొప్ప మనసున్నవాడని మరోసారి నిరూపించారు. ఒకప్పుడు 1959లో తన తండ్రి ఏఎన్ఆర్ ఆ కాలంలోనే కళాశాలకు లక్ష రూపాయలు విరాళంగా ఇచ్చి విద్యపై తన అభిమానాన్ని చాటితే, అదే బాటలో నడిచిన నాగార్జున నేటి తరానికి తగ్గట్టుగా కోట్ల రూపాయల విరాళం అందించారు.
ఈ సందర్భంగా నాగార్జున తన తండ్రిని గుర్తు చేసుకుంటూ భావోద్వేగంగా మాట్లాడారు. “మా నాన్న ఒక రైతుబిడ్డ. ఆయనకు చదువంటే చాలా ఇష్టం. స్వయంగా పెద్దగా చదువుకోలేకపోయినా, విద్య విలువను బాగా అర్థం చేసుకున్నారు. అప్పట్లో సినిమాకు కేవలం రూ.5,000 రెమ్యూనరేషన్ తీసుకునే రోజుల్లోనే, 1959లో కళాశాలకు లక్ష రూపాయలు విరాళంగా ఇచ్చారు. ఈ కాలేజీలో చదువుకున్న ఎంతో మంది విద్యార్థులు నేడు దేశ విదేశాల్లో ఉన్నత స్థాయిలో ఉన్నారు” అంటూ ఏఎన్ఆర్ విద్యపై చూపిన ప్రేమను గుర్తు చేశారు.
ఇక సినీ ప్రస్థానంలోకి వస్తే, నాగార్జున ప్రస్తుతం స్టార్ హీరోగానే కాకుండా, విభిన్నమైన పాత్రలతో క్యారెక్టర్ ఆర్టిస్టుగా కూడా ప్రేక్షకులను ఆకట్టుకుంటున్నారు. మరోవైపు తన ప్రతిష్టాత్మక 100వ సినిమా కోసం సిద్ధమవుతున్నారు. తమిళ దర్శకుడు రా.కార్తీక్ దర్శకత్వంలో రూపొందుతున్న ఈ చిత్రంలో టబు, అనుష్క శెట్టి కీలక పాత్రల్లో నటిస్తున్నారు. భారీ అంచనాల మధ్య తెరకెక్కుతున్న ఈ సినిమా వచ్చే ఏడాది ప్రేక్షకుల ముందుకు రానుంది.
సినిమాలతోనే కాదు, సేవా కార్యక్రమాలతో కూడా అక్కినేని కుటుంబం తన ప్రత్యేకతను నిలబెట్టుకుంటోందని మరోసారి నాగార్జున చేసిన ఈ విరాళం చాటిచెప్పింది.
Recent Random Post:
