శేఖర్ కమ్ముల సినీ ప్రయాణం ఈ ఏడాది 25 సంవత్సరాలు పూర్తిచేసుకుంది. 2000లో డాలర్ డ్రీమ్స్ సినిమాతో దర్శకుడిగా పరిచయం అయిన ఆయన, ఈ రెండు దశాబ్దాల్లో కేవలం 11 సినిమాలనే అందించారు. మొదటి సినిమాకి తర్వాత రెండో సినిమా వచ్చేందుకు నలుగురు ఏళ్లు పట్టగా, ఆ తర్వాత కూడా ప్రతి సినిమాకి కాస్త గ్యాప్ తీసుకుంటూ వచ్చారు.
2014లో వచ్చిన అనామిక తర్వాత మళ్లీ మూడు ఏళ్ల గ్యాప్లో ఫిదా (2017)ను తెరకెక్కించి బ్లాక్బస్టర్ అందించారు. కానీ ఫిదా తర్వాత కూడా అదే పద్ధతిలో మరో మూడు సంవత్సరాల తర్వాత లవ్ స్టోరీ (2021)తో ప్రేక్షకులను పలకరించారు. ఇప్పుడు లవ్ స్టోరీ తర్వాత కూడా మూడేళ్ల విరామం తర్వాతే ఆయన కుబేరను తీసుకొచ్చారు.
కుబేర మంచి హిట్ కావడంతో శేఖర్ కమ్ముల తదుపరి సినిమా కోసం అభిమానులు ఆసక్తిగా ఎదురు చూస్తున్నారు. అయితే ఆయన ఇంకా తన నెక్స్ట్ ప్రాజెక్ట్ను అధికారికంగా ప్రకటించలేదు. అయితే సినీ వర్గాల సమాచారం మేరకు లవ్ స్టోరీ తరహాలోనే ప్రేమకథా నేపథ్యంలో మరో సినిమా తెరకెక్కించనున్నట్టు చెబుతున్నారు.
ఇక తాజా సమాచారం ప్రకారం, కుబేర నిర్మాతలతోనే కమ్ముల తన తదుపరి సినిమాను చేయనున్నారని, స్క్రిప్ట్ వర్క్ ప్రస్తుతం జరుగుతోందని తెలుస్తోంది. అయితే ఇది అధికారికంగా ప్రకటించనప్పటికీ, శేఖర్ కమ్ముల గత ట్రాక్ రికార్డ్ను చూస్తే, ఆయన మళ్లీ సినిమాను మొదలుపెట్టి రిలీజ్ చేయడానికి కనీసం మూడేళ్లు పట్టేలా కనిపిస్తోంది.
ఈ నేపథ్యంలో అభిమానులు మాత్రం “ఇప్పటికైనా కమ్ముల స్పీడ్ పెంచాలని, వచ్చే ఏడాదిలోనే ఆయన తదుపరి సినిమాను చూడాలని” సోషల్ మీడియాలో విజ్ఞప్తి చేస్తున్నారు. ప్రతిభావంతుడైన దర్శకుడు ఇలా సంవత్సరాల పాటు గ్యాప్ తీసుకుంటే ఇండస్ట్రీకి నష్టం అంటూ కొందరు విమర్శలు చేస్తున్నారు.
కమ్ముల ఈసారి స్పీడ్ పెంచుతారా? లేదంటే మళ్లీ మూడేళ్లు వెయిట్ చేయాల్సి వస్తుందా అన్నది చూడాలి!
Recent Random Post:
