ఓ సినిమా రూపొందించాలంటే ఒక్కరిని కాదు, 24 శాఖల సమన్వయంతోనే సాధ్యం అవుతుంది. మొదటగా, మంచి కథ అవసరం. ఆ కథ రాయడం రచయిత చేతిలో ఉంటుంది. ఒక బలమైన కథే సినిమా భవితవ్యాన్ని నిర్ణయిస్తుంది. ఆ కథను దృశ్యరూపంలోకి తీసుకెళ్లే బాధ్యత దర్శకుడిపై ఉంటుంది. కథ కుదిరినప్పుడే మిగతా శాఖలు రంగంలోకి దిగుతాయి.
ఈ నేపథ్యంలో, మంచి రచయితల అవసరం ఎంతగానో ఉంది. కథలే కాదు, కామెడీ ట్రాక్లు రాయాలన్నా, కొత్త ఆలోచనలతో రాయగల రచయితలే వెనుకబడుతున్నారు. అయితే, ఇటీవలి సందర్భాల్లో రచయితలకు సరైన గౌరవం లభించడం లేదని నటుడు మరియు హాస్యనటుడు వెన్నెల కిషోర్ తన అభిప్రాయం వెల్లడించారు.
“ఇప్పటి కాలంలో ప్రేక్షకులను నవ్వించడం ఓ పెద్ద సవాలుగా మారింది. సోషల్ మీడియా రీల్స్ ఓపెన్ చేస్తే ఎన్నో కామెడీ సీన్లు కనిపిస్తాయి. అలాంటి పోటీలో థియేటర్కు వచ్చిన ప్రేక్షకుడు నవ్వేలా చేయాలంటే, మిగతా వేదికలకంటే బాగా ఇవ్వాలి. అలా చేయాలంటే మంచి పాత్రలు, మంచి రచన అవసరం,” అన్నారు కిషోర్.
ఇటీవల విడుదలైన ‘సింగిల్’ చిత్రంలో కీలక పాత్ర పోషించిన వెన్నెల కిషోర్, రచయితల హక్కుల గురించి మరోసారి చర్చ మొదలుపెట్టారు. “ఓ దర్శకుడికి ఇచ్చే గౌరవాన్ని రచయితకూ ఇవ్వాలి. లేదంటే వాళ్లు డైనోసార్లు లా మాయమవుతారు. కొత్త పాత్రలు, కొత్త కామెడీ రాయగలవారు లేకపోతే తెరపై పాత పాత్రలే తిరుగుతాయి. కానీ నాకు కొత్తగా ప్రెజెంట్ చేయడం ఇష్టం. నా పాత్ర కధకు కీలకం అయితే, అది నాకు గొప్ప సంతృప్తి ఇస్తుంది,” అన్నారు.
Recent Random Post:
