90వ దశకంలో రామానంద్ సాగర్ రూపొందించిన రామాయణం సీరియల్లో సీత పాత్ర పోషించిన దీపిక చిఖ్లియా భారతీయ ప్రేక్షకుల మనసుల్లో ప్రత్యేక స్థానం సంపాదించుకుంది. ప్రజలు ఆమెను అసలు పేరుతో కాకుండా సీతగా గుర్తించడమే దీని ఉదాహరణ. అయితే, ఈ సీరియల్ షూటింగ్ మొదలుకాకముందే, దీపికకు హాలీవుడ్ సినిమా నటించే అవకాశం వచ్చింది.
తాజాగా దీపిక స్నేహితురాలు ఓ ఇంటర్వ్యూలో దీని గురించి వెల్లడించింది. దీపికకు భారీ పారితోషికం ఆఫర్ చేసినప్పటికీ, ఆ చిత్రంలో బోల్డ్ సీన్స్ చేయాల్సి రావడంతో ఆమె తాను సీత పాత్రకే పరిమితం అవుతానని నిర్ణయించుకుని ఆ అవకాశాన్ని తిరస్కరించిందని పేర్కొంది.
తాజా ఇంటర్వ్యూలో కూడా దీపిక ఇదే విషయాన్ని స్పష్టం చేస్తూ, సీతగా తన ఇమేజ్ను దశాబ్దాలుగా కాపాడుకుంటూ వస్తున్నాను అని తెలిపారు. ఇంతకాలం తాను పోషించిన పాత్రను దృష్టిలో ఉంచుకుని, ఇటీవల వచ్చిన రెండు భారీ ఆఫర్లను కూడా తిరస్కరించానని చెప్పారు. ప్రజలు మనలను దేవతలుగా చూస్తారు, అలాంటప్పుడు విభిన్నమైన పాత్రలు చేయడం అసాధ్యం అని ఆమె పేర్కొన్నారు. తాను ఎప్పటికీ రామాయణంలో సీతగానే గుర్తింపును పొందాలని భావించానని, అందుకే నితీశ్ తివారీ రూపొందిస్తున్న రామాయణంలో కూడా తనకు వచ్చిన పాత్రను ఒప్పుకోలేదని తెలిపారు.
చిన్నతనం నుంచే నాటకాల్లో ఆసక్తి ఉన్న దీపిక, ఓ సందర్బంలో ప్రముఖ బెంగాలీ నటుడు ఉత్తమ్ కుమార్ ద్వారా బాలనటిగా అవకాశాన్ని దక్కించుకుంది. ఆ తర్వాత ఆమె రాజశ్రీ ప్రొడక్షన్ రూపొందించిన పేయింగ్ గెస్ట్ సీరియల్ ద్వారా ప్రాచుర్యం పొందింది. ఈ సీరియల్ తర్వాత ఆమెకు వరుసగా టీవీ సీరియల్ ఆఫర్లు వచ్చాయి.
రామాయణానికి ముందు, విక్రమ్ భేతాళ్ సీరియల్లోనూ నటించిన దీపిక, భగవాన్ దాదా, చీఖ్, ఖుదై, రాత్ కే అందర్ వంటి హిందీ చిత్రాల్లో కూడా నటించింది. 1992లో బెంగాలీ చిత్రం ఆశా ఓ భలో బాషా మరియు తమిళ చిత్రం నంగల్లో నటించింది. 2018లో విడుదలైన బాలా సినిమాలో యామీ గౌతమ్ తల్లి పాత్రలో కనిపించింది.
నటనా రంగంలో పేరు తెచ్చుకున్న దీపిక, 1991లో రాజకీయాల్లోకి ప్రవేశించారు. భారతీయ జనతా పార్టీ (BJP) తరఫున గుజరాత్లోని వడోదర స్థానం నుంచి లోక్సభ ఎన్నికల్లో పోటీ చేసి గెలుపొందారు. ఆమె, రాజా రంజిత్ సింగ్ గైక్వాడ్ను 50,000 పైగా ఓట్ల తేడాతో ఓడించి ఎంపీగా ఎన్నికయ్యారు.
తన జీవితంలో ఎన్నో ఆసక్తికరమైన అవకాశాలు వచ్చినా, సీత పాత్రకు కట్టుబడి ఉండటమే తన మొదటి నిర్ణయం అని దీపిక తెలిపారు. తాను ఎప్పటికీ ప్రజల మనసుల్లో రామాయణం సీతగానే నిలిచిపోవాలనుకుంటున్నానని మరోసారి స్పష్టం చేశారు.
Recent Random Post:
