ఐకాన్ ప్రాజెక్ట్ గుర్తుందా? కొన్ని నెలల క్రితం ఐకాన్ స్టార్ అల్లు అర్జున్ హీరోగా, ‘వకీల్ సాబ్’ ఫేమ్ డైరెక్టర్ వేణు శ్రీరామ్ దర్శకత్వంలో ఈ సినిమా అనౌన్స్ అయ్యింది. టైటిల్ పోస్టర్ కూడా అప్పటికే విడుదల కావడంతో అభిమానుల్లో మంచి హైప్ ఏర్పడింది. ప్రముఖ నిర్మాత దిల్ రాజు ఈ సినిమాను నిర్మించనున్నారు అని ప్రకటించారు.
అయితే ఆ తర్వాత ఈ సినిమా మీద ఎలాంటి అప్డేట్ రాకపోవడం, మేకర్స్ కూడా స్పందించకపోవడంతో ఇది షెల్వ్ అయిందన్న వార్తలు చక్కర్లు కొట్టాయి. తాజాగా నిర్మాత దిల్ రాజు స్వయంగా స్పందించారు. “ఐకాన్ ప్రాజెక్ట్ కచ్చితంగా తీస్తాం. కానీ అల్లు అర్జున్తో కాదు” అని తమ్ముడు సినిమా ప్రమోషన్లో వెల్లడించారు.
బన్నీ ప్రస్తుతం బిజీ షెడ్యూల్లో ఉండటంతో, ఐకాన్ సినిమాకు సమయం కేటాయించే పరిస్థితి లేదని, అందుకే వేరే హీరోతో ఈ ప్రాజెక్ట్ చేయాలని నిర్ణయించామని తెలిపారు. తమ్ముడు సినిమా తర్వాత దర్శకుడు వేణు శ్రీరామ్ ఐకాన్ స్క్రిప్ట్ను మళ్ళీ తీసుకెళ్లనున్నట్లు తెలిపారు. ఇది యూనివర్సల్ కాన్సెప్ట్తో ఉండే హ్యూమన్ యాక్షన్ డ్రామా అని వివరించారు.
ఇప్పటికే దిల్ రాజు ఓ స్టార్ హీరోతో చర్చలు జరుపుతున్నారని సమాచారం. తాజా వార్తల ప్రకారం, ఆ హీరో ఎవరంటే విజయ్ దేవరకొండ అని బలమైన ప్రచారం జరుగుతోంది. దిల్ రాజు బ్యానర్తో విజయ్కు మంచి రిలేషన్ ఉండటంతో, ఫిజికల్గా డిమాండ్ చేసే ఈ పాత్రకు విజయ్ సరిగ్గా సరిపోతాడని భావిస్తున్నారు.
ఈ సినిమాలో హీరోకు మేజర్ లుక్ ఛేంజ్ ఉండనుండటంతో, గ్లామర్కు తోడు శారీరకంగా సిద్ధంగా ఉండగల హీరోనే తీసుకోవాలని నిర్ణయించారట. విజయ్ దేవరకొండ ఇప్పటికే ఈ ప్రాజెక్ట్పై చర్చలు ప్రారంభించారని సమాచారం.
త్వరలోనే మేకర్స్ అధికారికంగా ప్రకటన చేస్తారని, 2025 చివర్లో షూటింగ్ ప్రారంభమయ్యే అవకాశముందని తెలుస్తోంది. మరోసారి ఓ ఆసక్తికరమైన కాన్సెప్ట్తో తెరపైకి రానున్న ‘ఐకాన్’ మూవీ, ఈసారి ఏ హీరోతో రీ-లాంచ్ అవుతుందో చూడాలి.
Recent Random Post:
