విలన్ తో డేటింగ్ పై హీరోయిన్ క్లారిటీ. కానీ…!

మలయాళ హీరోయిన్ ఐశ్వర్య లక్ష్మి తాజాగా వార్తల్లో నిలిచిన విషయం తెలిసిందే. మాయళ ఇండస్ట్రీలో ‘ప్రేమమ్’ ఫేమ్ హీరో నవీన్ పాలి నటించిన ఓ మలయాళ మూవీతో హీరోయిన్ గా తెరంగేట్రం చేసింది. ఇక వెర్సటైల్ అండ్ టాలెంటెడ్ హీరో సత్యదేవ్ నటించిన ‘గాడ్సే’ మూవీతో తెలుగు ప్రేక్షకుల్ని పలకరించింది. నవీన్ చంద్రతో ‘అమ్ము’ విష్ణు విశాల్ తో మట్టి కుస్తీ వంటి సినిమాల్లో నటించి హీరోయిన్ గా మంచి పేరు తెచ్చుకుంది. చిన్న చిన్న పాత్రల్లో నటిస్తూ తమిళంలో హీరోయిన్ గా మంచి పేరు తెచ్చుకుంటోంది ఐశ్వర్య లక్ష్మీ.

రీసెంట్ గా ది గ్రేట్ డైరెక్టర్ మణిరత్నం డ్రీమ్ ప్రాజెక్ట్ ‘పొన్నియిన్ సెల్వన్ 1’లోనూ మెరిసిన ఐశ్వర్య లక్ష్మి త్వరలో పార్టు 2గా రానున్న ‘పొన్నియిన్ సెల్వన్ 2’లోనూ నటిస్తోంది. వరుస సినిమాల్లో నటిస్తూ హీరోయిన్ గా మంచి పేరు తెచ్చుకుంటున్న ఐశ్వర్మ లక్ష్మీ గత కొంత కాలంగా ఓ విలన్ తో ప్రేమలో వుందంటూ నెట్టింట ప్రచారం జరుగుతోంది.

లోకేష్ కనగరాజ్ తెరకెక్కించిన ఖైదీ మాస్టర్ విక్రమ్ సినిమాల్లో విలన్ ఛాయలున్న పాత్రల్లో నటించి మంచి గుర్తింపుని తెచ్చుకున్న అర్జున్ దాస్ తో ఐశ్వర్య లక్ష్మి ప్రేమలో వుంని ప్రచారం మొదలైంది.

అయితే ఆ ప్రాచారాన్ని నిజం చేస్తూ తాజాగా ఐశ్వర్య లక్ష్మీ తన ఇన్ స్టా గ్రామ్ హ్యాండిల్ లో అర్జున్ దాస్ తో కలిసి వున్న ఓ ఫొటోని షేర్ చేసింది. దానికి క్యాప్షన్ గా లవ్ సింబల్ ని పోస్ట్ చేయడంతో తనతో వున్న రిలేషన్ షిప్ ని ఐశ్వర్య లక్ష్మి ఇలా బయట పెట్టి క్లారిటీ ఇచ్చేసిందంటూ వార్తలు మొదలయ్యాయి. అయితే ఈ వార్తల్లో ఎలాంటి నిజం లేదని మా మధ్య అలాంటిది ఏమీ లేదని ఇద్దరం మంచి మిత్రులం మాత్రమేనని ఐశ్వర్య లక్ష్మి తాజాగా పోస్ట్ పెట్టింది. తను పెట్టిన పోస్టని అపార్థం చేసుకున్నారని వాపోయింది.

‘హేయ్ అబ్బాయిలు… నా లాస్ట్ పోస్ట్ ఈ స్థాయిలో వైరల్ అవుతుందని.. ఓ రేంజ్ లో బ్లాస్ట్ అవుతుందని ఊహించలేదు. మేమిద్దరం మామూలుగా కలుసుకున్నాం అంతే. ఆ సందర్భంగా తీసుకున్న ఫొటో ఇది. దీన్నే నేను నెట్టింట పోస్ట్ చేశాను. మీరు ఊహిస్తున్నట్టుగా ఇక్కడ ఏమీ లేదు. మేము మంచి స్నేహితులం. నిన్నటి నుంచి నాకు మెసేజ్ లు చేస్తున్న అర్జున్ దాస్ అభిమానులందరికి ఒకటే చెబుతున్నా మీరంతా నిశ్చింతగా వుండండి. అతను మీ వాడు’ అంటూ క్లారిటీ ఇచ్చేసింది.

అయితే ఐశ్వర్య లక్ష్మి పెట్టిన పోస్ట్ పై కూడా ఫ్యాన్స్ కామెంట్ లు చేస్తున్నారు. మీ ఇద్దరి జంట బాగుంది. ఒకసారి ఈ విషయం గురించి ఆలోచించొచ్చు కదా అంటూ తనకు రిక్వెస్ట్ లు పెడుతున్నారు. మరి దీనిపై ఐశ్వర్య లక్ష్మి ఎలా స్పందిస్తుందో.. ఎలాంటి క్లారిటీ ఇస్తుందో చూడాలి.