ఫార్ములా ఈ రేస్ కేసులో మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ పై ఏసీబీ కేసు నమోదు చేసిన విషయం తెలిసిందే. ఈ క్రమంలో, ఈ రోజు ఏసీబీ విచారణకు కేటీఆర్ హాజరయ్యారు. అయితే, తన లాయర్‌ను పోలీసులు, ఏసీబీ అధికారులు అనుమతించకపోవడంపై కేటీఆర్ అభ్యంతరం వ్యక్తం చేశారు. దాదాపు 40 నిమిషాల పాటు కేటీఆర్ మరియు ఆయన లాయర్లు, పోలీసులు, అధికారులు మధ్య వాగ్వాదం జరిగింది.
లాయర్‌ను అనుమతించాలని కోర్టు ఉత్తర్వుల్లో నిబంధన లేదని పోలీసులు చెప్పారు. అయితే, కేటీఆర్ వారికే ప్రతిస్పందనగా, “లాయర్‌ను అనుమతించకూడదన్న నిబంధన ఎక్కడ ఉందో చూపండి” అని అభ్యంతరించారు. ఏసీబీ అధికారుల నుంచి స్పందన కోసం చాలా సేపు ఎదురుచూసిన కేటీఆర్, చివరకు విచారణకు హాజరు కాకుండా వెనుదిరిగారు.
తనకు నోటీసులిచ్చిన ఏసీబీ అడిషనల్ ఎస్పీకి లిఖితపూర్వకంగా సమాధానం ఇచ్చి కేటీఆర్ అక్కడి నుంచి వెళ్లిపోయారు. ఈ సమాధానాన్ని ఏసీబీ అధికారులు ఎక్నాలెడ్జ్ చేసినట్లు రిప్లై ఇచ్చారు. ఈ సందర్భంగా, కేటీఆర్ ఏసీబీ అధికారులపై, పోలీసులపై ఆసక్తికర వ్యాఖ్యలు చేశారు.
“నేను పోలీసులను నమ్మను, లాయర్లు ఉంటేనే నాకు రక్షణ” అని కేటీఆర్ అన్నారు. “సినిమా దర్శకుల కంటే ఏసీబీ అధికారులు మంచి కథలు చెబుతున్నారు” అని ఆయన జోస్యం చెప్పారు. పట్నం నరేందర్ రెడ్డి చెప్పని స్టేట్‌మెంట్‌ను పోలీసులు రాసుకున్నారని ఆయన ఆరోపించారు.
తనకు కూడా అలాంటి పరిస్థితి ఎదురవుతుందేమోనని అనుమానం వ్యక్తం చేశారు. “నా ఇంట్లో ఏసీబీ దాడులు చేసి ఏదైనా పెట్టి కుట్ర పన్ని నన్ను ఇరికించాలనుకుంటున్నారని” కేటీఆర్ పేర్కొన్నారు. రేపు ఈ కేసులో ఈడీ విచారణకు కేటీఆర్ హాజరవుతారా లేదా అన్నది ఆసక్తికరంగా మారింది.
Recent Random Post:
