టాలీవుడ్లో ప్రయోగాత్మక సినిమాలకు కేరాఫ్ అడ్రస్గా పేరుగాంచిన దర్శకుల్లో Singeetam Srinivasa Rao పేరు ఎప్పుడూ టాప్లోనే ఉంటుంది. కమర్షియల్ సినిమాలే ఆధిపత్యం చెలాయించిన కాలంలోనే వినూత్న ఆలోచనలతో ప్రేక్షకులను ఆశ్చర్యపరిచిన ఆయన, ఇప్పుడు 94 ఏళ్ల వయసులో మరో అరుదైన ఘనతతో వార్తల్లో నిలిచారు.
పుష్పక విమానం, ఆదిత్య 369, భైరవ ద్వీపం వంటి క్లాసిక్ చిత్రాలతో సింగీతం తన ప్రత్యేక ముద్ర వేశారు. ముఖ్యంగా ఆదిత్య 369 ద్వారా టైమ్ ట్రావెల్ కాన్సెప్ట్ను తెలుగు ప్రేక్షకులకు పరిచయం చేసిన తొలి దర్శకుడిగా ఆయనకు ప్రత్యేక గుర్తింపు ఉంది. మాటలు లేకుండా కథను చెప్పిన పుష్పక విమానం భారతీయ సినిమాకే ఒక మైలురాయిగా నిలిచింది.
దాదాపు ఆరు దశాబ్దాల సినీ ప్రయాణంలో 60కి పైగా చిత్రాలు తెరకెక్కించిన సింగీతం, చివరిసారిగా వెల్కమ్ ఒబామా సినిమాతో ప్రేక్షకులను అలరించారు. కొంత విరామం తర్వాత ఆయన ఇప్పుడు సింగ్ గీతం అనే కొత్త చిత్రంతో మళ్లీ మెగాఫోన్ పట్టారు. ఈ ప్రాజెక్ట్ను ప్రముఖ దర్శకుడు Nag Ashwin పర్యవేక్షణలో వైజయంతి మూవీస్ నిర్మిస్తోంది.
ఈ సినిమాతో సింగీతం ఒక అరుదైన రికార్డును సొంతం చేసుకున్నారు. 94 ఏళ్ల వయసులో ఫీచర్ ఫిల్మ్కి దర్శకత్వం వహించిన భారతీయ దర్శకుడిగా ఆయన నిలిచారు. అంతేకాకుండా ప్రపంచవ్యాప్తంగా జీవించి ఉన్న దర్శకుల్లో అత్యంత పెద్ద వయసులో సినిమా తెరకెక్కించిన వ్యక్తిగా కూడా గుర్తింపు పొందారు. గతంలో ఈ రికార్డు Clint Eastwood పేరిట ఉండేది.
అయితే ప్రపంచ స్థాయిలో చూస్తే ఈ రికార్డు ఇంకా Manoel de Oliveira పేరిటే ఉంది. ఆయన 103 ఏళ్ల వయసులో Gebo and the Shadow చిత్రాన్ని తెరకెక్కించారు.
ఇక తాజాగా విడుదలైన సింగ్ గీతం టీజర్ చూస్తే, ఈ వయసులో కూడా సింగీతం ఎంత ఎనర్జీతో పనిచేస్తున్నారో స్పష్టంగా కనిపిస్తోంది. కేవలం నాలుగు నెలల్లో షూటింగ్ పూర్తి చేయడం ఆయన డెడికేషన్కు నిదర్శనం. పాత తరం దర్శకుడైనా, కథను నేటి ప్రేక్షకులకు కనెక్ట్ అయ్యేలా రూపొందించడం ఆసక్తిని పెంచుతోంది.
ఇప్పుడు మరో చర్చ మొదలైంది—ఈ సినిమా తర్వాత సింగీతం మరో ప్రాజెక్ట్ చేస్తారా? చేస్తే తన రికార్డును తానే మళ్లీ బ్రేక్ చేస్తారా? అన్నది హాట్ టాపిక్గా మారింది. వయసు కేవలం సంఖ్య మాత్రమేనని మరోసారి నిరూపించిన సింగీతం, భవిష్యత్తులో కూడా సర్ప్రైజ్ ఇవ్వొచ్చని అభిమానులు ఆశిస్తున్నారు.
Recent Random Post:
