ప్రముఖ హీరోయిన్ సంయుక్త మీనన్ గురించి ప్రత్యేకంగా పరిచయాలు అవసరం లేదు. అమాయకమైన లుక్‌తో కనిపిస్తూనే, తన సహజ నటనతో ప్రేక్షకుల హృదయాలను గెలుచుకున్న ఈ ముద్దుగుమ్మ, తక్కువ కాలంలోనే మంచి గుర్తింపు సంపాదించుకుంది. పవర్ స్టార్ పవన్ కళ్యాణ్, రానా కాంబినేషన్‌లో వచ్చిన భీమ్లా నాయక్ సినిమాలో రానా భార్య పాత్రలో నటించి తెలుగు ప్రేక్షకులకు మరింత దగ్గరైంది. ముఖ్యంగా క్లైమాక్స్ సన్నివేశాల్లో ఆమె నటన ప్రేక్షకులను భావోద్వేగానికి గురిచేసింది.

సంయుక్త మీనన్ 2016లో పాప్‌కార్న్ అనే మలయాళ చిత్రంతో హీరోయిన్‌గా సినీ రంగ ప్రవేశం చేసింది. ఆ తర్వాత మలయాళం, తెలుగు, తమిళ్, కన్నడ భాషల్లో వరుస అవకాశాలు అందుకుంటూ తనకంటూ ప్రత్యేకమైన గుర్తింపు తెచ్చుకుంది. ఒక్కో భాషలో విభిన్నమైన పాత్రలు చేస్తూ, నటిగా మరింత మెరుగవుతూ ముందుకెళ్తోంది.

సినిమాలతో పాటు సోషల్ మీడియాలో కూడా ఈమె బాగా యాక్టివ్‌గా ఉంటుంది. ఇటీవల తరచూ గ్లామర్ ఫోటోషూట్లతో అభిమానులను ఆకట్టుకుంటోంది. తాజాగా ట్రాన్స్పరెంట్ డ్రెస్‌లో చేసిన ఫోటోషూట్ సోషల్ మీడియాలో హాట్ టాపిక్‌గా మారింది. కొంటెగా ఇచ్చిన ఫోజులు, ఆకట్టుకునే లుక్‌కి అభిమానులు ఫిదా అవుతున్నారు. ఈ ఫోటోలను షేర్ చేస్తూ “కొంచెం సాఫ్ట్… కొంచెం హాట్” అనే క్యాప్షన్ జోడించగా, నెటిజన్ల నుంచి మిశ్రమ స్పందన లభిస్తోంది.

2022లో కళ్యాణ్ రామ్ హీరోగా నటించిన బింబిసారలో హీరోయిన్‌గా మెప్పించిన సంయుక్త, 2023లో వచ్చిన తెలుగు-తమిళ్ బైలింగ్వల్ చిత్రం సార్లో టీచర్ పాత్రలో తన నటనతో మరోసారి ప్రశంసలు అందుకుంది. గతేడాది చివర్లో నటసింహా నందమూరి బాలకృష్ణ హీరోగా, బోయపాటి శ్రీను దర్శకత్వంలో వచ్చిన అఖండ 2లో నటించి ఆకట్టుకుంది. ఈ ఏడాది శర్వానంద్ సరసన నారీ నారీ నడుమ మురారి సినిమాలో హీరోయిన్‌గా కనిపించింది.

అయితే ఈ సినిమా సంక్రాంతి బ్లాక్‌బస్టర్‌గా నిలవాల్సి ఉన్నప్పటికీ, అదే సమయంలో పెద్ద సినిమాలు థియేటర్లలో సందడి చేయడంతో సరైన థియేటర్లు దొరకలేదు. కంటెంట్ బాగున్నా, కలెక్షన్లు ఆశించిన స్థాయిలో రాలేదనే టాక్ వినిపించింది.

ప్రస్తుతం సంయుక్త మీనన్ నిఖిల్ హీరోగా నటిస్తున్న స్వయంభు సినిమాలో కీలక పాత్రలో నటిస్తోంది. ఈ సినిమా టీజర్‌ను ఈ నెల 11న విడుదల చేయనున్నట్లు మేకర్స్ అధికారిక పోస్టర్‌తో ప్రకటించారు. ఈ ఏడాది ప్రేక్షకుల ముందుకు రానున్న ఈ చిత్రంపై మంచి అంచనాలు ఉన్నాయి.

ఇవే కాకుండా ఒక తమిళ్, ఒక మలయాళం చిత్రంతో పాటు విజయ్ సేతుపతి నటిస్తున్న సినిమాలో కూడా సంయుక్త భాగమవుతోంది. మొత్తానికి ఒకవైపు వరుస ప్రాజెక్టులతో బిజీగా ఉంటూనే, మరోవైపు తన గ్లామర్‌తో అభిమానులను ఆకట్టుకుంటూ కెరీర్‌ను వేగంగా ముందుకు తీసుకెళ్తోంది.

సూపర్ స్టార్ మహేష్ బాబు హీరోగా, టాలీవుడ్ జక్కన్న రాజమౌళి దర్శకత్వంలో రూపొందుతున్న భారీ చిత్రం ‘వారణాసి’ ప్రమోషన్ కార్యక్రమాలు మెల్లగా మొదలయ్యాయి. ఒకవైపు సినిమా షూటింగ్‌ జరుగుతుండగా, మరోవైపు ప్రమోషన్‌తో పాటు పోస్ట్‌ ప్రొడక్షన్ పనులు కూడా సమాంతరంగా కొనసాగుతున్నాయి.

ఇటీవల ప్రముఖ మీడియా సంస్థ స్క్రీన్ రాంట్ ప్లస్ కు వారణాసి యూనిట్ ఇచ్చిన ఇంటర్వ్యూ సోషల్ మీడియాలో వైరల్‌గా మారింది. ఈ ఇంటర్వ్యూలో రాజమౌళితో పాటు మహేష్ బాబు, ప్రియాంక చోప్రా, పృథ్వీరాజ్ సుకుమారన్ పాల్గొని సినిమాతో పాటు పలు ఆసక్తికర అంశాలపై మాట్లాడారు. సినిమా విషయాలకే పరిమితం కాకుండా వ్యక్తిగత అనుభవాలు, సంస్కృతి, జీవనశైలి గురించి కూడా వారు చేసిన వ్యాఖ్యలు దేశవ్యాప్తంగా చర్చనీయాంశంగా మారాయి.

ఈ ఇంటర్వ్యూలో ముఖ్యంగా మహేష్ బాబు కేరళ మరియు కలరి విద్య గురించి మాట్లాడిన తీరు అందరినీ ఆకట్టుకుంది. కలరి విద్య తనకు ఎంతో ఇష్టమని, ఒక సినిమా కోసం ఆరు నెలల పాటు కలరి విద్యను నేర్చుకున్నానని మహేష్ వెల్లడించారు. కలరి విద్య శరీరాన్ని ఫిట్‌గా ఉంచడమే కాకుండా బాడీలోని వివిధ భాగాలను బలంగా చేస్తుందని, అనారోగ్య సమస్యల నుంచి దూరంగా ఉండేందుకు సహాయపడుతుందని ఆయన తెలిపారు. మహేష్ మాటలు వింటూ పక్కనే ఉన్న పృథ్వీరాజ్ సుకుమారన్ షాక్‌కు గురవ్వడం గమనార్హం. మహేష్ బాబు ఇంత ఫిట్‌గా ఉండటానికి కలరి విద్య కూడా ఒక ప్రధాన కారణమనే చర్చ నడుస్తోంది.

ఇక ప్రియాంక చోప్రా కూడా ఇంటర్వ్యూలో ఆసక్తికర విషయాలను పంచుకున్నారు. తన అమ్మమ్మ కేరళకు చెందినవారని చెప్పుతూ, తనకు కూడా కేరళతో ప్రత్యేక అనుబంధం ఉందని వెల్లడించారు. అలాగే కేరళలో ప్రసిద్ధమైన కలరి విద్యపై తనకు మంచి అవగాహన ఉందని చెప్పారు. ప్రియాంక మాటలు విని పృథ్వీరాజ్ సుకుమారన్ ఆశ్చర్యపోతూ ‘అవునా?’ అని ప్రశ్నించడం అక్కడ హైలైట్‌గా నిలిచింది.

మొత్తంగా వారణాసి యూనిట్ సభ్యులు కేరళతో తమ అనుబంధం, అక్కడి సంస్కృతి, ప్రత్యేకతల గురించి మాట్లాడడంతో ఈ ఇంటర్వ్యూ వీడియో క్లిప్స్ ప్రస్తుతం సోషల్ మీడియాలో తెగ వైరల్ అవుతున్నాయి. ముఖ్యంగా కేరళకు చెందిన సినీ అభిమానులతో పాటు రాజమౌళి, మహేష్ బాబు, ప్రియాంక చోప్రా అభిమానులు ఈ వీడియోలను విస్తృతంగా షేర్ చేస్తున్నారు.

ఇక మలయాళ నటుడు పృథ్వీరాజ్ సుకుమారన్ మాట్లాడుతూ, భారత్‌లో ఆహారం ఎంత విభిన్నంగా ఉంటుందో వివరించారు. ప్రాంతానికొక ప్రత్యేక రుచి ఉంటుందని, భారతీయ సినిమాలు ఎలా విభిన్నంగా ఉంటాయో అలాగే ఫుడ్ కూడా ఎంతో ప్రత్యేకంగా ఉంటుందని చెప్పారు. తాను సీ ఫుడ్‌ను ఎక్కువగా ఇష్టపడతానని కూడా వెల్లడించారు.

వారణాసి సినిమా నుంచి ఇప్పటికే విడుదలైన గ్లింప్స్, పోస్టర్లు అంచనాలను భారీగా పెంచాయి. వచ్చే ఏడాది ప్రేక్షకుల ముందుకు రాబోతున్న ఈ చిత్రాన్ని హాలీవుడ్ స్థాయిలో విడుదల చేయాలనే లక్ష్యంతో భారీ ప్రమోషన్ ప్లాన్ చేస్తున్నారని సమాచారం. ఇప్పటివరకు రాజమౌళి నుంచి వచ్చిన సినిమాలన్నీ ఒక ఎత్తయితే, వారణాసి వాటన్నింటికీ మించి ఉండబోతుందనే నమ్మకంతో మహేష్ బాబు అభిమానులతో పాటు సినీ ప్రేక్షకులు ఎంతో ఆసక్తిగా ఎదురు చూస్తున్నారు.