సరైనోడు చిత్రంలో విలన్ పాత్రతో గుర్తింపు తెచ్చుకున్న ఆది పినిశెట్టి, గడిచిన ఏళ్లలో మలుపు, ఏకవీర వంటి సినిమాల్లో హీరోగా కనిపించినప్పటికీ, నిజమైన గుర్తింపు బన్నీకి ప్రతినాయకుడిగా నటించాకే వచ్చింది. ఇప్పుడు చాలా గ్యాప్ తర్వాత, శబ్దం సినిమాతో ప్రేక్షకులను పలకరించాడు.

హారర్ జానర్‌లో తెరకెక్కిన ఈ సౌండ్ థ్రిల్లర్ మీద భయంకరమైన సినిమాలను ప్రేమించే ప్రేక్షకుల్లో భారీ అంచనాలు నెలకొన్నాయి. ట్రైలర్ ఆకట్టుకోవడంతో పాటు, తమన్ అందించిన బ్యాక్‌గ్రౌండ్ స్కోర్ మరింత హైప్‌ను పెంచింది. అంతేకాక, వైశాలి తర్వాత ఈ జానర్‌లో మరో ఇంట్రెస్టింగ్ సినిమాగా కనిపించడంతో, ఓ వర్గం ప్రేక్షకులు దీని కోసం ఎంతో ఆసక్తిగా ఎదురుచూశారు. అయితే, ఓపెనింగ్స్ మాత్రం ఊహించిన స్థాయిలో రాలేదు.

కథ పరంగా చూస్తే, దర్శకుడు అరివజగన్ వెంకటాచలం ఓ వైవిధ్యమైన పాయింట్ ఎంచుకున్నాడు. మన్నార్ కొండ ప్రాంతంలోని ఓ కాలేజీలో వరుసగా విద్యార్థులు ఆత్మహత్యలు చేసుకుంటూ ఉంటారు. వీటి వెనుక అసలు కారణాలు తెలుసుకునేందుకు ఘోస్ట్ ఇన్వెస్టిగేటర్ వ్యోమా (ఆది పినిశెట్టి) రంగంలోకి దిగుతాడు. అలా అన్వేషణలో తలమునకలై, కాలేజీ పాత లైబ్రరీలో నలభై రెండు ఆత్మలు ఉన్నట్లు గుర్తిస్తాడు. ఆత్మల వెనుక గల డయానా (సిమ్రాన్) కథ తెలియడంతో అసలు మిస్టరీ మొదలవుతుంది. కాలేజీ భవనంలో ఈ హత్యలు ఎలా జరిగాయి? ఎవరు చేయించారు? ఇంత పెద్ద కుట్రకు కారణమైన నిజమేంటి? అనే ప్రశ్నలకు సమాధానం శబ్దం కథనం అంతా.

ఫస్ట్ హాఫ్ వరకు ఓ మోస్తరు సస్పెన్స్, థ్రిల్ మైంటైన్ చేసిన ఈ సినిమా, సెకండాఫ్ ఫ్లాష్‌బ్యాక్ నుంచి లయ తప్పింది. టెక్నికల్‌గా టీమ్ పని మెచ్చుకోదగినదే అయినా, భయపెట్టే ఎలిమెంట్స్ లోపించడంతో కథనం ఆసక్తి తగ్గింది. ప్రీ-క్లైమాక్స్‌లో ఇచ్చిన విలన్ ట్విస్ట్ కూడా ప్రేక్షకులను ఆశ్చర్యపరిచేలా లేదని చెప్పాలి. స్క్రీన్‌ప్లే కూడా వైశాలి స్థాయిలో gripping లేకపోవడం శబ్దం అనుభూతిని తగ్గించేసింది.

తమన్ అందించిన బ్యాక్‌గ్రౌండ్ స్కోర్ బాగున్నప్పటికీ, కెరీర్ బెస్ట్ అనిపించలేదు. క్యాస్టింగ్‌లో కొన్ని తప్పులు జరిగినట్లు అనిపించింది. హారర్ సినిమాలను విపరీతంగా ఇష్టపడే ప్రేక్షకులకు కొంత నచ్చొచ్చేమోగానీ, అందరికీ ఈ శబ్దం చేరడం కష్టమే.

నితేష్ తివారీ దర్శకత్వంలో అత్యంత ప్రతిష్టాత్మకంగా తెరకెక్కుతున్న రామాయణం గురించి చిత్ర నిర్మాత నమిత్ మల్హోత్రా ఆసక్తికరమైన వ్యాఖ్యలు చేశారు. ప్రపంచవ్యాప్తంగా రామాయణ మహత్యాన్ని అందరికీ తెలియజేయాలనే లక్ష్యంతోనే ఈ సినిమా రూపొందిస్తున్నామని, గ్రాండ్ విజువల్స్, అత్యాధునిక టెక్నాలజీతో హాలీవుడ్ స్థాయిలో తెరకెక్కిస్తున్నామని ఆయన వెల్లడించారు.

ఇటీవల జరిగిన ఇంటర్వ్యూలో రామాయణం ఆస్కార్ అవార్డు గెలుచుకుంటుందా అనే ప్రశ్నకు నమిత్ ఆసక్తికరంగా స్పందించారు. విజువల్స్ కీలకంగా ఉండే ఈ సినిమా ఖచ్చితంగా ఆస్కార్ రేసులో నిలిచే అవకాశం ఉందని, అంతేకాకుండా ఒక సినిమా విజయాన్ని సరైన ప్రమోషన్ నిర్ణయిస్తుందని అభిప్రాయపడ్డారు. గతంలో ఓ స్టార్ హీరో చేసిన రామాయణ కథ ఆధారిత సినిమా విమర్శలకు గురైన నేపథ్యంలో, తాము ఈ చిత్రంపై ప్రత్యేక శ్రద్ధ తీసుకుంటున్నామని తెలిపారు.

రామాయణం కథను తెరకెక్కించే అవకాశం అందరికీ రాదు. అందుకే, మనోభావాలను దెబ్బతీయకుండా, అన్ని కోణాల్లో జాగ్రత్తలు తీసుకుంటూ ఈ సినిమా రూపొందిస్తున్నామని నమిత్ అన్నారు. ఈ సినిమా ప్రపంచవ్యాప్తంగా గుర్తింపు పొందేలా చేస్తామని, హాలీవుడ్ చిత్రమైన ‘ఓప్పెన్ హైమర్’ కు దక్కిన స్థాయిలో ఈ రామాయణం కూడా నిలిచిపోతుందని ధీమా వ్యక్తం చేశారు.

ఇండియన్ సినిమా ఇండస్ట్రీలో మోస్ట్ ప్రెస్టీజియస్ ప్రాజెక్ట్ గా రూపొందుతున్న ఈ చిత్రంలో రాంచంద్రుడిగా రణ్‌బీర్ కపూర్, సీతగా సాయి పల్లవి, రావణాసురుడిగా కన్నడ స్టార్ యశ్, హనుమంతుడిగా సన్నీ డియోల్, శూర్పణఖగా రకుల్ ప్రీత్ నటించనున్నారని సమాచారం.

ఈ రామాయణం రెండు భాగాలుగా విడుదల కానుంది. ఫస్ట్ పార్ట్ 2026లో, సెకండ్ పార్ట్ 2027లో ప్రేక్షకుల ముందుకు రానుంది. ఇదిలా ఉంటే, నమిత్ చేసిన వ్యాఖ్యలు ప్రభాస్ నటించిన ‘ఆదిపురుష్’ సినిమాను ఉద్దేశించి చేసినవేనని సినీ వర్గాల్లో చర్చ జరుగుతోంది. ఈ చిత్రానికి నిర్మాతగా నమిత్ మల్హోత్రాతో పాటు యశ్ కూడా వ్యవహరిస్తున్నట్లు తెలుస్తోంది.

పాండిచ్చేరిలో చోటుచేసుకున్న క్రిప్టో కరెన్సీ మోసానికి సంబంధించి నటీమణులు తమన్నా, కాజల్ అగర్వాల్ విచారణకు హాజరుకావాల్సిన అవసరం ఉందని పాండిచ్చేరి పోలీసులు నిర్ణయించిన సంగతి తెలిసిందే.

క్రిప్టో కరెన్సీలో పెట్టుబడి పెడితే భారీ లాభాలు వస్తాయని ఆశ చూపుతూ, పాండిచ్చేరికి చెందిన పది మంది నుంచి సుమారు రూ. 2.40 కోట్లు వసూలు చేసి మోసం జరిగినట్లు అశోకన్ అనే విశ్రాంతి ఉద్యోగి ఫిర్యాదు చేశారు. ఈ వ్యవహారం కోయంబత్తూరును ప్రధాన కేంద్రంగా ప్రారంభమైంది.

ఈ క్రిప్టో సంస్థ ప్రారంభోత్సవంలో తమన్నా, ఇతర ప్రముఖులు పాల్గొనగా, మహాబలిపురంలోని ఓ స్టార్ హోటల్‌లో జరిగిన ఈ కార్యక్రమానికి కాజల్ అగర్వాల్ కూడా హాజరైనట్లు తెలుస్తోంది. అనంతరం ముంబైలో ఓ భారీ పార్టీ నిర్వహించి వేలాది మంది నుంచి పెట్టుబడులు సేకరించినట్లు ఆరోపణలు ఉన్నాయి. ఈ ఘటనలో నితీష్ జైన్, అరవింద్ కుమార్ అనే ఇద్దరిని పోలీసులు ఇప్పటికే అరెస్ట్ చేశారు.

దర్యాప్తులో భాగంగా తమన్నా, కాజల్‌లను కూడా విచారించాలని పోలీసులు నిర్ణయించగా, వారికీ నోటీసులు జారీ కానున్నట్లు వార్తలు వస్తున్నాయి. అయితే, ఈ ప్రచారాన్ని తమన్నా ఖండిస్తూ తాను ఎలాంటి సంబంధం లేనని స్పష్టం చేసింది.

“క్రిప్టో కరెన్సీ కేసులో నన్ను లింక్ చేస్తున్న వార్తలు నా దృష్టికి వచ్చాయి. ఇవన్నీ పూర్తిగా తప్పుడు ప్రచారం. దయచేసి ఇలాంటి అసత్య కథనాలను నమ్మవద్దు. అలాగే మీడియా సంస్థలు బాధ్యతగా వ్యవహరించి, నిరాధార వార్తలను ప్రసారం చేయకూడదు.” అని తమన్నా ఓ ప్రకటనలో పేర్కొంది.

ఇదిలా ఉండగా, కాజల్ అగర్వాల్ ఈ వ్యవహారంపై ఇంకా స్పందించలేదు. ఆమె ఏ విధంగా రియాక్ట్ అవుతుందో చూడాల్సి ఉంది. ఇకపోతే, పోలీసులు దర్యాప్తు ముమ్మరం చేసిన నేపథ్యంలో ఈ కేసులో మరిన్ని వివరాలు వెలుగులోకి వచ్చే అవకాశముంది.