“కాలర్ ఎగరేయను… గంతులు వేయను… అరవను కూడా… ప్రశాంతంగా నా యుద్ధం నేను చేస్తా.” గుంటూరులో నిర్వహించిన ‘లెనిన్’ సక్సెస్ మీట్లో అక్కినేని అఖిల్ చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. భారీ విజయాన్ని అందుకున్న తర్వాత హీరోలు ఉత్సాహంగా మాట్లాడటం సహజం. కానీ అఖిల్ మాత్రం ఎంతో పరిణితితో స్పందిస్తూ, తన అసలు ప్రయాణం ఇప్పుడే ప్రారంభమవుతోందని చెప్పడం అందరి దృష్టిని ఆకర్షించింది.
అక్కినేని కుటుంబ వారసుడిగా సినీ రంగంలోకి అడుగుపెట్టిన అఖిల్కు కెరీర్ ప్రారంభం నుంచే సవాళ్లు ఎదురయ్యాయి. భారీ అంచనాల మధ్య వచ్చిన తొలి చిత్రం ఆశించిన విజయాన్ని అందుకోలేదు. అనంతరం చేసిన సినిమాల్లో నటుడిగా మంచి గుర్తింపు తెచ్చుకున్నప్పటికీ, బాక్సాఫీస్ వద్ద మాత్రం ఆయనకు ఆశించిన స్థాయి కమర్షియల్ విజయం దక్కలేదు.
‘మోస్ట్ ఎలిజిబుల్ బ్యాచిలర్’ కొంత ఊరటనిచ్చినా, ఎంతో కష్టపడి చేసిన ‘ఏజెంట్’ తీవ్ర నిరాశను మిగిల్చింది. ఆ సినిమా కోసం అఖిల్ చేసిన శారీరక శ్రమ, డెడికేషన్కు ప్రశంసలు వచ్చినా, ఫలితం మాత్రం అనుకూలంగా రాలేదు. దీంతో ఆయన తదుపరి సినిమా ఎలా ఉండబోతుందనే ఆసక్తి అభిమానుల్లో నెలకొంది. తొందరపడకుండా కొంత విరామం తీసుకుని సరైన కథ కోసం ఎదురుచూసిన అఖిల్కు, ఆ నిరీక్షణకు సమాధానంగా ‘లెనిన్’ నిలిచింది.
రాయలసీమ నేపథ్యంలోని ఈ యాక్షన్ డ్రామాలో అఖిల్ పూర్తిగా కొత్త అవతారంలో కనిపించారు. మాస్ ప్రేక్షకులను ఆకట్టుకునే అంశాలతో రూపొందిన ఈ చిత్రం విడుదలైన తర్వాత మంచి స్పందనను అందుకుంది. ముఖ్యంగా ఆయన నటన, స్క్రీన్ ప్రెజెన్స్, పాత్రలో ఒదిగిపోయిన తీరు ప్రేక్షకులను ఆకట్టుకున్నాయి.
అయితే ఇప్పుడు సినిమా విజయంతో పాటు, అఖిల్ చేసిన వ్యాఖ్యలే ఎక్కువ చర్చకు వస్తున్నాయి. “ఇక్కడి నుంచే నా జర్నీ మొదలవుతుంది” అని ఆయన చెప్పడం వెనుక బలమైన సందేశం ఉందని అభిమానులు భావిస్తున్నారు. ఇప్పటివరకు ఎదురైన విజయాలు, పరాజయాలను పక్కనబెట్టి కొత్త అధ్యాయాన్ని ప్రారంభిస్తున్నాననే సంకేతాన్ని అఖిల్ ఇచ్చినట్లు కనిపిస్తోంది.
గతంలో వరుస పరాజయాల కారణంగా అఖిల్ కెరీర్పై అనేక విమర్శలు వచ్చాయి. సోషల్ మీడియాలో కూడా పలు చర్చలు జరిగాయి. అలాంటి పరిస్థితుల్లో ‘లెనిన్’ ఆయనకు కేవలం ఒక హిట్ సినిమానే కాదు, తిరిగి ఆత్మవిశ్వాసాన్ని అందించిన కీలక మలుపుగా నిలిచిందనే అభిప్రాయం వ్యక్తమవుతోంది.
అయితే అఖిల్ కూడా అసలు ప్రయాణం ఇప్పుడే మొదలవుతుందని స్పష్టం చేశారు. ఒక విజయంతో కెరీర్ దిశ మారొచ్చు. కానీ ఆ విజయాన్ని నిలబెట్టుకోవాలంటే వరుస విజయాలు అవసరమని ఆయనకు బాగా తెలుసు. అందుకే సంబరాల కంటే బాధ్యతను ముందుకు ఉంచుతూ, “ప్రశాంతంగా నా యుద్ధం నేను చేస్తా” అని చెప్పిన మాటల్లో ఆత్మవిశ్వాసంతో పాటు పరిణితి కూడా స్పష్టంగా కనిపించింది.
‘లెనిన్’ అఖిల్కు విజయాన్ని మాత్రమే కాదు, కొత్త ఆరంభానికి బలమైన పునాది కూడా ఇచ్చింది. ఇక ఈ నిశ్శబ్ద పోరాటం ఆయనను టాలీవుడ్లో ఎంతటి స్థాయికి తీసుకెళ్తుందో చూడాల్సి ఉంది.
Recent Random Post:
