టాలీవుడ్ సినీ పరిశ్రమపై ఆదాయ పన్ను శాఖ (ఐటీ) సోదాలు కొనసాగుతున్నాయి. హైదరాబాద్‌లో పలువురు ప్రముఖ నిర్మాతల ఇళ్లపై, ఆఫీసులపై గత రెండు రోజులుగా ఈ దాడులు జరుగుతున్నాయి. ప్రముఖ నిర్మాత, తెలంగాణ ఫిల్మ్ డెవలప్‌మెంట్ కార్పొరేషన్ (ఎఫ్‌డీసీ) ఛైర్మన్ దిల్ రాజు నివాసంలో కూడా ఐటీ అధికారులు సోదాలు నిర్వహించారు.
బుధవారం తన ఇంట్లో సోదాలు జరుగుతుండగా, దిల్ రాజు మీడియాతో మాట్లాడారు. ఆయన “మన చేతిలో ఏముంటది, వాళ్లు ఎప్పుడు చెబితే అప్పుడు. సరదాగా ఇక్కడ కూర్చున్నాను” అంటూ స్పందించారు. ఈ దాడులు ఒక్క తనపై మాత్రమే కాకుండా, టాలీవుడ్ పరిశ్రమ మొత్తంపై జరుగుతున్నాయని తెలిపారు.
దిల్ రాజు నిర్మించిన భారీ బడ్జెట్ చిత్రాలు ‘గేమ్ ఛేంజర్’ మరియు ‘సంక్రాంతికి వస్తున్నాం’ సంక్రాంతి తర్వాత విడుదల కానున్న నేపథ్యంలో ఈ దాడులు జరగడం చర్చనీయాంశంగా మారింది. మంగళవారం ఉదయం నుంచే దిల్ రాజు నివాసంతో పాటు, శ్రీ వెంకటేశ్వర క్రియేషన్స్ ఆఫీసులో కూడా అధికారులు తనిఖీలు చేపట్టారు. సినిమా ప్రాజెక్టులకు సంబంధించి ఖర్చులు, ఆదాయ పన్ను చెల్లింపులపై దర్యాప్తు జరుపుతున్నారు.
దిల్ రాజు సోదరుడు శిరీష్, కూతురు హన్సితా రెడ్డి నివాసాలు, ఆయన వ్యాపార భాగస్వామి మ్యాంగో మీడియా రామ్ ఆఫీసులు కూడా ఈ దాడుల్లో భాగమయ్యాయి. బ్యాంకు లాకర్లను ఓపెన్ చేయించి, ఆస్తుల పత్రాలను పరిశీలించినట్లు సమాచారం.
అంతేకాకుండా, మైత్రీ మూవీ మేకర్స్, సుకుమార్ రైటింగ్స్, ఏకే ఎంటర్టైన్మెంట్స్ వంటి ఇతర నిర్మాణ సంస్థలపై కూడా సోదాలు కొనసాగుతున్నాయి. మొత్తం 55 బృందాలు ఈ దాడుల్లో పాల్గొన్నాయని, నిర్మాతల ఆదాయం, పన్నుల చెల్లింపుల మధ్య తేడాలను గుర్తించినట్లు సమాచారం.
ఈ దాడులతో టాలీవుడ్ పరిశ్రమలో కలకలం రేగింది. పన్ను చెల్లింపుల్లో వివరణ ఇచ్చే వరకు దాడులు కొనసాగనున్నట్లు తెలుస్తోంది.
Recent Random Post:
