ఇటీవలి కాలంలో సినిమా, రాజకీయ, క్రీడా రంగాలకు చెందిన ప్రముఖుల జీవితాలను బయోపిక్స్గా తెరకెక్కిస్తూ, ప్రేక్షకులకు తెలియని ఎన్నో ఆసక్తికర అంశాలను తెరపై ఆవిష్కరిస్తున్నారు. ముఖ్యంగా చారిత్రక నేపథ్యంతో కూడిన కథలు ఇప్పుడు ప్రేక్షకులను మరింత ఆకట్టుకుంటున్నాయి. ఈ క్రమంలోనే భారతీయ సినిమా పితామహుడిగా గుర్తింపు పొందిన దుండిరాజ్ గోవింద్ ఫాల్కే (దాదాసాహెబ్ ఫాల్కే) జీవితకథను భారీ బయోపిక్గా తెరకెక్కించేందుకు బాలీవుడ్ సిద్ధమవుతోంది.
భారతీయ సినీ నిర్మాత, దర్శకుడు, స్క్రీన్ప్లే రచయితగా అపారమైన ఖ్యాతి సంపాదించిన దాదాసాహెబ్ ఫాల్కే, 1913లో తొలి భారతీయ ఫీచర్ ఫిల్మ్ను నిర్మించి చరిత్ర సృష్టించారు. తన జీవితకాలంలో దాదాపు 95 ఫీచర్ సినిమాలు రూపొందించిన ఆయన, భారతీయ సినిమా పునాదులను వేసిన మహానుభావుడిగా నిలిచారు. ఆయన గౌరవార్థం సినీ రంగంలో అత్యుత్తమ ప్రతిభ చూపిన కొద్దిమందికే దాదాసాహెబ్ ఫాల్కే అవార్డు అందజేస్తూ, వారిని ప్రత్యేక స్థాయికి చేర్చుతున్న విషయం తెలిసిందే.
ఇప్పుడు ఇదే నేపథ్యంలో, దాదాసాహెబ్ ఫాల్కే జీవితం ఆధారంగా బాలీవుడ్లో ఓ ప్రతిష్ఠాత్మక బయోపిక్ తెరకెక్కించేందుకు స్టార్ హీరో అమీర్ ఖాన్, ప్రముఖ దర్శకుడు రాజ్కుమార్ హిరానీ కలయికలో ప్రయత్నాలు మళ్లీ ఊపందుకున్నాయి. నిజానికి ఈ ప్రాజెక్ట్కు సంబంధించిన స్క్రిప్ట్ పని కొన్నేళ్ల క్రితమే ప్రారంభమైనా, కొన్ని కారణాల వల్ల మధ్యలో ఆగిపోయింది. దాంతో అభిమానులు కూడా నిరాశ వ్యక్తం చేశారు.
కానీ తాజా సమాచారం ప్రకారం, అమీర్ ఖాన్–హిరానీ కాంబినేషన్ మళ్లీ పట్టాలెక్కినట్లు తెలుస్తోంది. ఈ బయోపిక్కు సంబంధించిన స్క్రిప్ట్ వర్క్ తిరిగి ప్రారంభమైందని సోషల్ మీడియాలో బలమైన వార్తలు వినిపిస్తున్నాయి. దాదాసాహెబ్ ఫాల్కే జీవితాన్ని నిజాయితీగా చూపిస్తూనే, నేటి తరం ప్రేక్షకులకు కూడా కనెక్ట్ అయ్యేలా కథను మలచాలని అమీర్ ఖాన్ భావిస్తున్నారట. అందుకే సమకాలీన నేటివిటీకి తగ్గట్టుగా కథనాన్ని రూపొందించేందుకు ఇద్దరూ ప్రత్యేక శ్రద్ధ తీసుకుంటున్నారని సమాచారం. అన్నీ అనుకున్నట్లు జరిగితే, మార్చి నుంచి షూటింగ్ ప్రారంభమయ్యే అవకాశాలు కనిపిస్తున్నాయి.
సున్నితమైన చారిత్రక అంశం కావడంతో చిత్ర బృందం చాలా జాగ్రత్తగా ముందుకు వెళ్తోంది. రాజ్కుమార్ హిరానీ చివరిగా షారుక్ ఖాన్తో ‘డంకీ’ సినిమాను తెరకెక్కించారు. ఆ సినిమాపై సోషల్ మీడియాలో వచ్చిన విభిన్న అభిప్రాయాలను దృష్టిలో ఉంచుకుని, ఈ బయోపిక్ విషయంలో ఎలాంటి వివాదాలకు తావివ్వకుండా అత్యంత బాధ్యతాయుతంగా తెరకెక్కించాలని హిరానీ భావిస్తున్నారట. మరోవైపు అమీర్ ఖాన్ కూడా ఈ ప్రాజెక్ట్పై విమర్శలకు అవకాశం లేకుండా ప్రతి అంశాన్ని నిశితంగా పరిశీలిస్తున్నట్లు సమాచారం.
అమీర్ ఖాన్–హిరానీ కాంబినేషన్ గతంలో ‘3 ఇడియట్స్’, ‘పీకే’ వంటి బ్లాక్బస్టర్ సినిమాలను అందించింది. ఇప్పుడు అదే జోడీతో దాదాసాహెబ్ ఫాల్కే బయోపిక్ రానుండటంతో అంచనాలు భారీగా పెరిగిపోయాయి. అయితే, హిరానీ సున్నితమైన విషయాలను తెరపై చూపేటప్పుడు తరచూ వివాదాలు ఎదుర్కొన్న నేపథ్యం కూడా ఉంది. అందుకే ఇది బయోపిక్ కావడంతో, చిన్న తప్పు జరిగినా విమర్శలు వచ్చే అవకాశముందని ట్రేడ్ వర్గాలు అభిప్రాయపడుతున్నాయి.
ఇదిలా ఉండగా, ప్రస్తుతం అమీర్ ఖాన్, హిరానీ కలిసి ‘3 ఇడియట్స్’ సీక్వెల్పై కూడా పని చేస్తున్నట్లు సమాచారం. ఆ ప్రాజెక్ట్ పూర్తయిన వెంటనే దాదాసాహెబ్ ఫాల్కే బయోపిక్ను అధికారికంగా ప్రారంభించనున్నారని టాక్. భారతీయ సినిమా ఆవిర్భావాన్ని, దానికి బాటలు వేసిన మహానుభావుడి జీవితాన్ని తెరపై చూడాలని అభిమానులు ఆసక్తిగా ఎదురుచూస్తున్నారు.
Recent Random Post:
