తెలుగు రాజకీయాల్లో సంచలనం సృష్టించిన వైఎస్ విజయసాయిరెడ్డి రాజకీయ సన్యాసం తీసుకున్నా, ఆయన చుట్టూ ఆసక్తికర పరిణామాలు మాత్రం కొనసాగుతూనే ఉన్నాయి. ఒకప్పుడు వైఎస్సార్ కాంగ్రెస్ పార్టీకి కీలక నేతగా, ముఖ్యమంత్రి జగన్ అత్యంత విశ్వసనీయుడిగా నిలిచిన విజయసాయి, ఇటీవల రాజకీయాల నుంచి పూర్తిగా విరమిస్తున్నట్టు ప్రకటించారు. అయితే, రాజకీయాలకు గుడ్బై చెప్పినప్పటికీ, ఆయన్ని చుట్టూ చర్చలు మౌనించడంలేదు.
తాజాగా విజయసాయిరెడ్డి, ఏపీ కాంగ్రెస్ చీఫ్ వైఎస్ షర్మిలతో భేటీ కావడం కొత్త రాజకీయ ప్రకంపనలకు దారితీస్తోంది. మూడు రోజుల క్రితం హైదరాబాద్లోని లోటస్ పాండ్లో వీరిద్దరి భేటీ జరిగినట్లు సమాచారం. ఈ భేటీ ఏకంగా మూడున్నర గంటల పాటు సాగిందని, ఇద్దరూ రాజకీయాల గురించే సుదీర్ఘంగా చర్చించుకున్నారన్న ఊహాగానాలు వినిపిస్తున్నాయి. అంతేకాకుండా, షర్మిలతో భోజనం కూడా చేసినట్లు తెలుస్తోంది.
గతంలో జగన్, షర్మిల మధ్య విభేదాలు వచ్చినప్పుడు, విజయసాయిరెడ్డి పూర్తిగా జగన్ వైపు నిలబడ్డారు. షర్మిలపై విమర్శలు చేస్తూ పలు సందర్భాల్లో కఠిన వ్యాఖ్యలు చేశారు. అయితే, ఇప్పుడు రాజకీయాల నుంచి దూరంగా ఉంటానన్న విజయసాయి, షర్మిలతో సన్నిహితంగా సమావేశమవడం కొత్త చర్చలకు దారితీస్తోంది.
ఇదంతా ఒక సాధారణ సమావేశమేనా? లేక రాజకీయ సమీకరణాల్లో ఏదైనా మార్పుకు సంకేతమా? అన్న ప్రశ్నలు తలెత్తుతున్నాయి. రాజకీయంగా మౌనం పాటిస్తున్న విజయసాయి, షర్మిలకు మద్దతుగా కొత్త అడుగులు వేయనున్నారా? అన్నది ఆసక్తికరంగా మారింది.
Recent Random Post:
