టాలీవుడ్ యంగ్ హీరో అడివి శేష్, మృణాల్ ఠాకూర్ జంటగా నటించిన ‘డెకాయిట్’ సినిమా విజయం నిర్మాత సుప్రియ యార్లగడ్డ నమ్మకాన్ని నిజం చేసింది. రొటీన్ ఫార్మాట్లో వెళ్లడం సేఫ్ అయినప్పటికీ, చరిత్ర సృష్టించాలంటే రిస్క్ తప్పదని ఆమె అభిప్రాయపడ్డారు. మంచి కథల కోసం తపించే ప్రేక్షకులకు, ముఖ్యంగా జెన్-జీ ఆడియెన్స్కు ఈ సినిమా బాగా కనెక్ట్ అయ్యిందని ఆమె పేర్కొన్నారు. చిత్రానికి లభిస్తున్న స్పందనపై సంతోషం వ్యక్తం చేస్తూ మీడియాతో తన అనుభవాలను పంచుకున్నారు.
మంచి సినిమాలు తీయాలంటే తప్పకుండా రిస్క్ తీసుకోవాల్సిందేనని సుప్రియ యార్లగడ్డ బలంగా నమ్ముతారు. ‘డెకాయిట్’ విషయంలో కూడా అదే దృక్పథంతో ముందుకు వెళ్లినట్లు తెలిపారు. రొటీన్ కథలకు భిన్నంగా డ్రామా, ఎమోషన్స్తో కూడిన ప్రేమకథను ఎంచుకోవడం సవాలుగా ఉన్నప్పటికీ, అదే సినిమాకు ప్రత్యేకతను తెచ్చిందన్నారు. తనకు ప్రేమకథలు అంటే ప్రత్యేక ఆసక్తి ఉందని, తెలుగులో అలాంటి లోతైన కథలు తగ్గిపోతున్న నేపథ్యంలో ఈ ప్రాజెక్ట్ను ఎంచుకున్నట్లు చెప్పారు. ముఖ్యంగా క్లైమాక్స్ సినిమాకు పెద్ద హైలైట్గా నిలిచిందని, ప్రేక్షకులు దానిపైనే ఎక్కువగా మాట్లాడుకుంటున్నారని ఆమె తెలిపారు.
సినిమా నిర్మాణ సమయంలో ఖర్చులను నియంత్రిస్తూ, క్వాలిటీ విషయంలో ఎక్కడా రాజీ పడలేదని సుప్రియ వివరించారు. తెలుగుతో పాటు హిందీలో కూడా ఒకేసారి షూటింగ్ చేయడం వల్ల షెడ్యూల్ కొంత పెరిగినప్పటికీ, అది సినిమాకు ప్లస్ అయ్యిందని చెప్పారు. ప్రస్తుతం హిందీ వెర్షన్కు మంచి స్పందన వస్తోందని, మలయాళంలో పరిమిత థియేటర్లలో విడుదలైనప్పటికీ ప్రేక్షకులను ఆకట్టుకుంటోందని ఆనందం వ్యక్తం చేశారు. త్వరలోనే ఈ చిత్రం ఐదు భాషల్లో ఓటీటీలో విడుదల కానుందని తెలిపారు.
సినిమా ప్రారంభ దశలో రొటీన్ కథతో ముందుకు వెళ్లొచ్చు కదా అనే సూచనలు వచ్చినప్పటికీ, తాను ప్రత్యేకమైన కంటెంట్తోనే ముందుకు వెళ్లాలని నిర్ణయించుకున్నట్లు చెప్పారు. ఎడిటింగ్ దశలో కొత్త టీమ్తో సమయానికి సినిమా పూర్తవుతుందా అనే అనుమానాలు ఉన్నప్పటికీ, అందరి కృషితో అనుకున్న సమయానికే అవుట్పుట్ సిద్ధమైందని గుర్తుచేశారు. సినిమా పట్ల ఉన్న ప్రేమతో ప్రతిసారి ప్రేక్షకులకు కొత్త అనుభూతిని ఇవ్వాలనే లక్ష్యంతో పనిచేస్తున్నానని తెలిపారు. ప్రేమ, త్యాగం, ద్రోహం వంటి బలమైన భావోద్వేగాలతో కూడిన క్లాసిక్ సినిమాలను మళ్లీ తెరపైకి తీసుకురావడమే తన లక్ష్యమని స్పష్టం చేశారు. క్వాలిటీ కంటెంట్ ఉంటే ఎన్ని సవాళ్లు ఉన్నా విజయం తప్పదని ‘డెకాయిట్’ నిరూపించిందని, భవిష్యత్తులో కూడా కొత్త దర్శకులు, వైవిధ్యమైన కథలకు తాను ఎప్పుడూ మద్దతుగా ఉంటానని సుప్రియ యార్లగడ్డ భరోసా ఇచ్చారు.
Recent Random Post:
