యూత్ స్టార్ నితిన్ పవర్ స్టార్ పవన్ కళ్యాణ్ కు వీరాభిమాని అన్న సంగతి తెలిసిందే. తన అభిమాన హీరోగా పవన్ ను ఎంతో ఆరాధించే నితిన్, అతడి నటన, ఫైట్లు, డాన్సులు అన్నింటినీ ఎంతో ఇష్టపడతాడు. అంతేకాదు, పవన్ ఆశయాలు, సిద్ధాంతాలు కూడా నితిన్ కు ఎంతో ఆకర్షణీయంగా అనిపిస్తాయి. ఈ నేపథ్యంలో ఇద్దరి మధ్య మంచి బాండింగ్ ఏర్పడింది.
నితిన్ సినిమాల కోసం పవన్ ముఖ్య అతిథిగా రావడం, అలాగే పవన్ సినిమాల కోసం నితిన్ హాజరవడం వంటివి గతంలోనే చూశాం. ప్రస్తుతం పవన్ కళ్యాణ్ జనసేన పార్టీ ద్వారా ఆంధ్రప్రదేశ్ డిప్యూటీ సీఎం గా సేవలు అందిస్తుండగా, ఆయన సుదీర్ఘ రాజకీయ ప్రయాణాన్ని కొనసాగించాలని భావిస్తున్నారు. ప్రజలకు తన వంతుగా సేవ చేయాలని తపిస్తున్న పవన్ ఆశయాల బాటలో నితిన్ కూడా రాజకీయ రంగ ప్రవేశం చేస్తాడా? అనే ప్రశ్న చాలా కాలంగా చర్చనీయాంశంగా మారింది.
ఇప్పటివరకు ఈ విషయం నితిన్ తన అభిప్రాయం వెల్లడించకపోయినప్పటికీ, ఇటీవల తన తాజా చిత్రం ‘రాబిన్ హుడ్’ ప్రమోషన్లో పాల్గొన్న సందర్భంగా రాజకీయాల్లోకి వచ్చే అవకాశం ఉందా? అని అడిగిన ప్రశ్నకు స్పష్టత ఇచ్చాడు. తన ఆసక్తి పూర్తిగా సినిమాలపైనే ఉందని, భవిష్యత్తులో కూడా రాజకీయాల్లోకి ప్రవేశించే ఉద్దేశం లేదని నితిన్ తేల్చిచెప్పాడు.
ఇంతవరకు రాజకీయాల్లోకి వచ్చే అవకాశంపై ఊహాగానాలు ఉండగా, నితిన్ ఈ క్లారిటీతో తన సినిమా కెరీర్కే పూర్తిగా కట్టుబడి ఉంటానని స్పష్టం చేశాడు. నితిన్ తండ్రి సుధాకర్ రెడ్డి ఒక ప్రముఖ నిర్మాత. డిస్ట్రిబ్యూషన్ రంగం నుంచి నిర్మాణ రంగానికి వచ్చిన ఆయన ఇప్పటికే కుటుంబ నిర్మాణ బాధ్యతలను తన కుమార్తె, నితిన్ సోదరి చేతికి అప్పగించారు.
ఈ ప్రకటనతో నితిన్ రాజకీయాలకు దూరంగా ఉంటాడని, అతను సంపూర్ణంగా నటన మీదనే దృష్టి సారిస్తాడని ఖరారైంది. ఇక ‘రాబిన్ హుడ్’ సినిమాతో నితిన్ మరో హిట్ అందుకోవాలని అభిమానులు ఎదురుచూస్తున్నారు.
Recent Random Post:
