టాలీవుడ్ ‘దేశముదురు’ బ్యూటీ హన్సిక మోత్వానీ వ్యక్తిగత జీవితంలో తీసుకున్న కీలక నిర్ణయం ఇప్పుడు ఇండస్ట్రీలో హాట్ టాపిక్గా మారింది. వ్యాపారవేత్త సోహైల్ కతూరియాతో ఆమె అధికారికంగా విడాకులు తీసుకున్న వార్త అభిమానులను ఆశ్చర్యానికి గురిచేసింది. అయితే ఈ విషయంలో హన్సిక స్పందించిన తీరు మాత్రం అందరి దృష్టిని ఆకర్షిస్తోంది. విడాకుల తర్వాత తొలిసారిగా సోషల్ మీడియాలో చేసిన ఆమె పోస్ట్ ప్రస్తుతం నెట్టింట వైరల్ అవుతోంది. కష్టసమయంలో కూడా పాజిటివ్గా ఎలా ఉండాలో ఆమె తన మాటలతో చూపించింది.
చట్టబద్ధంగా విడాకులు మంజూరైన మరుసటి రోజే హన్సిక తన ఇన్స్టాగ్రామ్ స్టోరీలో “Chardi Kala Always” అని రాసింది. పంజాబీ భాషలో ఈ పదానికి అర్థం ఏమిటంటే.. జీవితంలో ఎన్ని కష్టాలు వచ్చినా, ఎలాంటి సవాళ్లు ఎదురైనా ధైర్యంగా, సానుకూల దృక్పథంతో ముందుకు సాగడం. తన వైవాహిక జీవితం ముగిసినా తాను కృంగిపోలేదని, మరింత ధైర్యంగా జీవితాన్ని కొనసాగించాలని నిర్ణయించుకున్నట్లు ఈ పోస్ట్ ద్వారా హన్సిక స్పష్టం చేసింది.
ఇంకా ఆసక్తికరమైన విషయం ఏమిటంటే, విడాకుల సమయంలో హన్సిక తన భర్త నుంచి ఎలాంటి భరణం (అలిమనీ) కూడా కోరలేదని తెలుస్తోంది. ఆర్థిక ప్రయోజనాల కంటే తన మనశ్శాంతికే ఆమె ప్రాధాన్యం ఇచ్చిందని ఆమె లాయర్ వెల్లడించారు. మార్చి 11న ముంబైలోని బాంద్రా ఫ్యామిలీ కోర్టు వీరిద్దరికీ పరస్పర అంగీకారంతో విడాకులు మంజూరు చేసింది. గత కొంతకాలంగా అభిప్రాయభేదాలు, జీవనశైలిలో వచ్చిన మార్పుల కారణంగా వీరి బంధం దెబ్బతిందని, అందుకే విడిపోవాలని నిర్ణయించుకున్నట్లు కోర్టు పత్రాల్లో పేర్కొన్నారు.
2022 డిసెంబర్లో జైపూర్లోని ఒక కోటలో అట్టహాసంగా జరిగిన వీరి వివాహం అప్పట్లో పెద్ద సంచలనంగా మారింది. ఆ పెళ్లి వేడుకలను డిజిటల్ ప్లాట్ఫామ్లో ఒక డాక్యుమెంటరీగా కూడా విడుదల చేశారు. అయితే పెళ్లి జరిగిన కొద్ది కాలానికే అభిప్రాయభేదాలు తలెత్తడంతో, 2024 జూలై నుంచే వీరిద్దరూ వేర్వేరుగా జీవిస్తున్నట్లు సమాచారం. బంధువులు, స్నేహితులు నచ్చజెప్పినా ఫలితం లేకపోవడంతో చివరకు న్యాయపరంగా విడిపోవాలని నిర్ణయించుకున్నారు.
ప్రస్తుతం హన్సిక తన కెరీర్పై పూర్తిగా దృష్టి పెట్టింది. సౌత్ ఇండియాలో స్టార్ హీరోయిన్గా గుర్తింపు పొందిన ఆమె, రాబోయే రోజుల్లో మరిన్ని మంచి ప్రాజెక్టులతో ప్రేక్షకుల ముందుకు రావడానికి సిద్ధమవుతోంది. జీవితంలో ఎత్తుపల్లాలు సహజమని, వాటిని ధైర్యంగా ఎదుర్కొని ముందుకు సాగడమే నిజమైన విజయం అని హన్సిక తన నిర్ణయంతో చూపిస్తోంది. ఆమె తీసుకున్న ఈ ధైర్యవంతమైన నిర్ణయానికి నెటిజన్లు కూడా మద్దతు తెలుపుతున్నారు.
Recent Random Post:
