దారుణం, దుర్మార్గం, ఘోర అవమానం.. రాష్ట్ర ముఖ్యమంత్రికి కేంద్రం అపాయింట్‌మెంట్ ఇవ్వకపోవడమా.? కేంద్రం వద్ద రాష్ట్రం మోకరిల్లాలన్నంత అహంకారం కేంద్రం ప్రదర్శించడమా.? ఇలాంటి చాలా మాటలు చంద్రబాబు హయాంలో విన్నాం.. 2014 నుంచి 2018 వరకు టీడీపీ – బీజేపీ కలిసి పనిచేశాయి. రాష్ట్రంలో, కేంద్రంలో రెండు పార్టీలూ అధికారం పంచుకున్నాయి. 2018లో ఆ బంధం తెగింది, కేంద్రం.. రాష్ట్రాన్ని పట్టించుకోవడం పూర్తిగా మానేసింది. చంద్రబాబుకి ఢిల్లీ అపాయింట్‌మెంట్ దొరకడం గగనమైపోయింది. దాంతో, ఏపీలో వైసీపీ అనుకూల మీడియా చేసిన రచ్చ అంతా ఇంతా కాదు. టీడీపీ అనుకూల మీడియా తక్కువేం తిన్లేదు.. వెరసి, నానా యాగీ జరిగింది. ఇప్పుడేం జరుగుతోంది.? ఇప్పుడూ అదే పరిస్థితి.

ముఖ్యమంత్రి మారారు.. చంద్రబాబు స్థానంలోకి వైఎస్ జగన్ వచ్చారు. సేమ్ ట్రీట్‌మెంట్ ఢిల్లీ పెద్దల నుంచి రాష్ట్ర ముఖ్యమంత్రికి ఎదురవుతోంది. కేంద్ర మంత్రి అమిత్ షా అపాయింట్‌మెంట్ దొరక్కపోవడంతో ముఖ్యమంత్రి వైఎస్ జగన్ తన ఢిల్లీ యాత్రని రద్దు చేసుకోవాల్సి వచ్చింది. రద్దు కాదిది, వాయిదా.. అంటోంది రాష్ట్ర ప్రభుత్వం. రాష్ట్రానికి సంబంధించి అత్యంత కీలకమైన చాలా అంశాలపై కేంద్రంతో చర్చించేందుకు ముఖ్యమంత్రి ఢిల్లీకి వెళ్ళాలనుకున్నారన్నది ప్రభుత్వ వాదన. కాదు కాదు, తన మీద కేసుల వ్యవహారమై ఢిల్లీ పెద్దల కాళ్ళ మీద పడాలని జగన్ అనుకుంటున్నారంటూ ప్రధాన ప్రతిపక్షం తెలుగేదేశం పార్టీ విమర్శిస్తోంది. వీటిల్లో ఏది నిజం.? అన్నది వేరే చర్చ.

కేంద్ర ప్రభుత్వ పెద్దలు అపాయింట్‌మెంట్ ఇవ్వకపోవడం మాత్రం ఆక్షేపణీయమే. వ్యాక్సినేషన్ సహా చాలా సమస్యలున్నాయి ఆంధ్రపదేశ్ రాష్ట్రంలో కేవలం కరోనాకి సంబంధించి. పోలవరం ప్రాజెక్టు సహా పాత అంశాలు అదనం. ఈ అంశాలపై చర్చించాలని ముఖ్యమంత్రి అనుకుంటోంటే, కేంద్ర ప్రభుత్వ పెద్దలు అపాయింట్‌మెంట్ ఇవ్వకపోవడమేంటి.? కాస్త ఆలోచించాల్సిన విషయమే ఇది. అప్పుడు చంద్రబాబు మీద వైసీపీ ఎగిరింది.. ఇప్పుడు వైసీపీ మీద టీడీపీ ఎగురుతోంది. పెద్దగా తేడా లేదు.. ఇద్దరికీ సమస్థాయిలో అవమానం కేంద్రంలో అధికారంలో వున్న బీజేపీ చేస్తోంది. కానీ, ఈ అవమానం ఆయా పార్టీలకో, ఆయా వ్యక్తులకో, ముఖ్యమంత్రులకో మాత్రమే కాదు.. రాష్ట్రానికి. ఇది అత్యంత బాధాకరమైన విషయం.

రెండేళ్ళ పాలన విషయమై అధికార వైసీపీ చేసుకుంటున్న ప్రచారం అంతా ఇంతా కాదు. పెన్షన్ల మొత్తాన్నీ పెంచేశాం.. విద్యార్థులకు స్కూల్ యూనిపాంలు అందించేస్తున్నాం.. అమ్మ ఒడి ఇస్తున్నాం.. జగనన్న వసతి దీవెన సహా చాలా చాలా చేసేశాం, చేసేస్తూనే వున్నాం. దాదాపుగా రాష్ట్రంలో అన్ని కుటుంబాలూ ఏదో ఒక సంక్షేమ పథకం ద్వారా లబ్ది పొందుతున్నాయ్.. అంటూ వైసీపీ చేసుకుంటున్న ప్రచారం గురించి ఎంత చెప్పుకున్నా తక్కువే.

అంతా బాగానే వుందిగానీ, రాష్ట్ర ప్రభుత్వం గడచిన రెండేళ్ళల్లో చేసిన అప్పులెంత.? వాటికి కట్టిన, కట్టాల్సిన వడ్డీలెంత.? ప్రజల మీద పడుతున్న భారమెంత.? ఈ ప్రశ్నలకి కూడా వైసీపీ ప్రభుత్వం సమాధానం చెబితే బావుంటుంది. ఫలానా పథకాన్ని ప్రారంభిస్తున్నాం, అమలు చేస్తున్నామంటూ ప్రకటనల కోసం కూడా ప్రభుత్వ ఖజానా నుంచే ఖర్చు చేస్తున్న జగన్ సర్కార్, ప్రతి నెలా చేస్తున్న కొత్త అప్పుల గురించీ, వాటి వడ్డీల గురించి కూడా ప్రకటనలు ఇస్తే ప్రజలకు వైఎస్ జగన్ సర్కార్ చెప్పి చేస్తున్నవీ, చెప్పకుండానే ఉద్ధరించేస్తున్నవీ ఏంటనేది ఇంకా స్పష్టంగా అర్థమవుతుంది.

పెట్రోల్ ధర పొరుగు రాష్ట్రాలతో పోల్చితే, ఆంధ్రపదేశ్ రాష్ట్రంలో ఎందుకు ఎక్కువగా వుంది.? పన్నులు ఎందుకు పెరుగుతున్నాయి.? వంటి అంశాలపైనా ప్రకటనలు గుప్పిస్తే.. ప్రజలు వాస్తవాల్ని తొందరగా అర్థం చేసుకుంటారు. సంక్షేమ పథకాల్ని ఎందుకు జగన్ సర్కార్ అమలు చేస్తోందో మొన్నటి స్థానిక ఎన్నికలతోనే అందరికీ అర్థమయ్యింది. ‘మాకు ఓటెయ్యకపోతే సంక్షేమ పథకాల్ని ఎత్తేస్తాం..’ అని బెదిరించడం ద్వారా, అధికారాన్ని శాశ్వతంగా నిలబెట్టుకోవడానికి సంక్షేమ పథకాల పేరుతో ఓటు బ్యాంకు రాజకీయాలు చేయడం, ఈ క్రమంలో ప్రజల్ని అప్పుల్లోకి నెట్టేయడం తప్ప వైఎస్ జగన్ సర్కార్, గడచిన రెండేళ్ళలో రాష్ట్ర ప్రజల్ని ఏం ఉద్ధరించిందని.?

ప్రత్యేక హోదా వచ్చిందా.? విశాఖ రైల్వే జోన్ వచ్చిందా.? ఆంధ్రపదేశ్ రాజధాని ఏది.? దుగరాజపట్నం పోర్టు ఏమయ్యింది.? కడప స్టీలు ప్లాంటు ఏమయ్యింది.? పోలవరం ప్రాజెక్టు పరిస్థితేంటి.? రాష్ట్రంలో రోడ్ల దుస్థితి ఎలా వుంది.? పొరుగు రాష్ట్రాలకు ఉపాధి కోసం ఎందుకు చదువుకున్నోళ్ళు, చదువు లేనోళ్ళు వలస పోవాల్సి వస్తోంది.? వీటికి సమాధానం చెప్పి, ఆ తర్వాత ప్రకటనల కోసం ప్రజాధనాన్ని జగన్ సర్కార్ ఖర్చు చేస్తే దానికో అర్థం వుంటుంది.