టాలీవుడ్ నటి, యాంకర్ అనసూయ భరద్వాజ్ పై సోషల్ మీడియాలో అసభ్యకర పోస్టులు పెట్టిన వ్యక్తులపై సైబరాబాద్ సైబర్ క్రైమ్ పోలీసులు కఠిన చర్యలు తీసుకున్నారు. అనసూయ ఫిర్యాదును స్వీకరించిన పోలీసులు ఇద్దరు నిందితులను అరెస్ట్ చేశారు. సెలబ్రిటీలను లక్ష్యంగా చేసుకుని సోషల్ మీడియాలో అసభ్య వ్యాఖ్యలు, మార్ఫింగ్ వీడియోలు పోస్ట్ చేసే వారిపై పోలీసులు పర్యవేక్షణ కొనసాగిస్తామని హెచ్చరించారు.
పోలీసుల వివరాల ప్రకారం, ఆంధ్రప్రదేశ్లోని కడప జిల్లా కు చెందిన జనార్దన్ హైదరాబాద్లోని గచ్చిబౌలి ఇంద్రానగర్ ప్రాంతంలో నివసిస్తున్నాడు. అతడు AI (ఆర్టిఫిషియల్ ఇంటెలిజెన్స్) టెక్నాలజీ ఉపయోగించి ఫేక్ వీడియోలను రూపొందించి వాటిని ఇన్స్టాగ్రామ్ సహా పలు సోషల్ మీడియా ప్లాట్ఫామ్లలో పోస్ట్ చేసి, అసభ్యకర వ్యాఖ్యలు జోడించి వైరల్ చేశాడు.
అనసూయ ఫిర్యాదుతో కేసు నమోదు చేసిన పోలీసులు డిజిటల్ ప్రూఫ్లను సేకరించి జనార్దన్ను గుర్తించి అదుపులోకి తీసుకున్నారు. విచారణలో సోషల్ మీడియాలో వ్యూస్, ఫాలోవర్లు పెంచుకోవాలనే ఉద్దేశంతో ఈ పోస్టులు పెట్టారని నిందితుడు అంగీకరించాడు. అతడిపై పలు సెక్షన్ల కింద కేసులు నమోదు చేసి విచారణ కొనసాగుతోంది.
మరో ఘటనలో సికింద్రాబాద్ వెస్ట్, మారేడుపల్లి కు చెందిన అరుణ్ కుమార్ అనే వ్యక్తిని కూడా పోలీసులు అరెస్ట్ చేశారు. అనసూయ సోషల్ మీడియాలో అప్లోడ్ చేసిన రీల్ పై కామెంట్ సెక్షన్లో అసభ్యకర వ్యాఖ్యలు చేసినట్లు గుర్తించి, విచారణ తర్వాత అతడిని అదుపులోకి తీసుకుని కోర్టులో హాజరుపరిచారు. న్యాయస్థానం అతడిని జైలుకు పంపింది.
కొంతకాలంగా అనసూయపై సోషల్ మీడియాలో భారీ ట్రోలింగ్ జరుగుతోంది. కొన్ని వ్యక్తులు ఆమె ఫోటోలు, వీడియోలను మార్ఫింగ్ చేసి వైరల్ చేస్తున్నారు, అసభ్యకర వ్యాఖ్యలు చేస్తున్నారు. ఈ వేధింపులు తీవ్ర స్థాయికి చేరుకోవడంతో గత జనవరిలో అనసూయ సైబరాబాద్ సైబర్ క్రైమ్ పోలీసులను ఆశ్రయించారు. మొత్తం 42 మంది పై కేసులు నమోదు చేసి దర్యాప్తు ప్రారంభించారు. డిజిటల్ ప్రూఫ్ల ఆధారంగా ప్రధాన నిందితులను గుర్తించి అరెస్టు చేశారు.
పోలీసులు హెచ్చరించినట్లుగా, సోషల్ మీడియాలో మహిళల గౌరవాన్ని దెబ్బతీసేలా పోస్టులు, కామెంట్లు చేసే వారిపై చట్టపరమైన చర్యలు తప్పవు. ఇలాంటి ఘటనలు రిపీట్ కాకుండా మరింత ఫోకస్ పెంచుతున్నట్లు పోలీసులు తెలిపారు.
Recent Random Post:
