బాలీవుడ్ స్టార్ హీరో సైఫ్ అలీ ఖాన్పై కొద్ది నెలల క్రితం జరిగిన దాడి గురించి ఇప్పటికీ చర్చ కొనసాగుతోంది. అర్థరాత్రి సమయంలో ఓ దుండగుడు సైఫ్ ఇంట్లోకి చొరబడి, ఆయన చిన్న కొడుకు జేహ్ గదిలోకి వెళ్లేందుకు ప్రయత్నించాడు. అయితే, ఇంటి సహాయకురాలు ఇది గుర్తించి గట్టిగా కేకలు వేయడంతో సైఫ్ అలీ ఖాన్ అప్రమత్తమయ్యారు. వెంటనే అక్కడికి చేరుకుని దొంగను అడ్డుకున్న సైఫ్, అతనితో తీవ్రంగా పోరాడాల్సి వచ్చింది.
ఈ గొడవలో దుండగుడు కత్తితో దాడి చేయడంతో సైఫ్ వెన్నెముకకు గాయమైంది. ఈ సంఘటన గురించి ఇటీవల సైఫ్ కుమార్తె, నటి సారా అలీఖాన్ స్పందించారు. ఓ ఇంటర్వ్యూలో ఆమె, “అప్పటి ఘటన మా అందరికీ షాకింగ్ అనుభవంగా మారింది. ఏం జరుగుతోందో అర్థం కాని అయోమయ పరిస్థితిలో పడ్డాం,” అని చెప్పుకొచ్చింది.
సారా మాట్లాడుతూ, “అందరం హాస్పిటల్కు పరుగెత్తాం. ఆ సమయంలో మా ఫోన్లు నిరంతరం రింగవుతూ, మా తండ్రి ఆరోగ్య పరిస్థితిని గురించి అప్డేట్స్ వస్తూనే ఉన్నాయి. ఆ పావుగంట కాలం మొత్తం నాకు జీవితకాలం లాగే అనిపించింది,” అని వెల్లడించారు.
అయితే, ఆసుపత్రి నుంచి తన తండ్రి చిరునవ్వుతో బయటకు వచ్చేనాటికి మాత్రమే తన మనసుకు నెమ్మది కలిగిందని, ఆయన ధైర్యం చూసి తాను ఎంతో సంతోషించినట్టు చెప్పారు. “ఎలాంటి పరిస్థితిలోనైనా తండ్రి చివరి వరకూ పోరాడి, అనుకున్నది సాధిస్తారన్న నమ్మకం నాకు ఎప్పుడూ ఉంది,” అని సారా అభిప్రాయపడింది.
అయితే, తాను మాత్రం తండ్రిలా ధైర్యంగా ఉండలేనని, అలాంటి ప్రమాదకర పరిస్థితులను ఎదుర్కోలేనని సారా తెలిపారు. “నాకు తండ్రి ధైర్యం లేదు. ఇలాంటి ఘటన ఎదురైతే ముందే కన్నీళ్లు పెట్టుకుని భయపడిపోతాను,” అని సారా ఆలీఖాన్ భావోద్వేగంగా చెప్పారు.
సైఫ్ అలీ ఖాన్ ప్రస్తుతం పూర్తి ఆరోగ్యంగా ఉన్నా, కుటుంబం మాత్రం ఆ సంఘటనను మర్చిపోలేకపోతున్నట్లు తెలుస్తోంది.
Recent Random Post:
