జేడీ చక్రవర్తి మాట్లాడుతూ, తాను పనిచేసిన ఒక సినిమాలో హీరోయిన్తో నిర్మాత అసభ్యంగా ప్రవర్తించారని తెలిపారు. ఆ ఘటన చూసి తాను ఆ నిర్మాతను ఎదిరించానని, అవసరమైతే కొట్టానని కూడా చెప్పారు. అయితే ఆ సినిమా పేరు కానీ, సంబంధిత వ్యక్తుల వివరాలు కానీ బయటపెట్టబోనని స్పష్టం చేశారు. ఇండస్ట్రీ మొత్తాన్ని అలాంటి ఘటనలతో కలిపి చూడటం సరైంది కాదని ఆయన అభిప్రాయపడ్డారు.
సినిమా రంగంలో 95 శాతం మంది ఎంతో ప్రొఫెషనల్గా వ్యవహరిస్తారని, కేవలం 5 శాతం మంది మాత్రమే ఇలాంటి తప్పులు చేస్తారని జేడీ అన్నారు. ఇతర రంగాల్లో పరిస్థితి ఇంకా భిన్నంగా ఉండొచ్చని కూడా వ్యాఖ్యానించారు. ఇలాంటి ఘటనలకు కారణమయ్యే వారు నిజమైన సినీ నిర్మాతలు కాదని, కొంతమంది ఇతర వ్యాపారాల నుంచి సరదాగా సినిమాల్లోకి వస్తారని తెలిపారు. వారికి ప్రొఫెషనల్ విలువలు ఉండవని, కానీ నిజమైన నిర్మాతలు సినిమా కోసం మాత్రమే పనిచేస్తారని ఆయన పేర్కొన్నారు.
సినిమాలు ప్రేక్షకుల కోసం తీస్తామని, డబ్బు పెట్టి సినిమా నిర్మించేవారికి తమ బాధ్యత బాగా తెలుసని జేడీ చక్రవర్తి అన్నారు. ఒక తప్పు జరిగితే మొత్తం పేరు దెబ్బతింటుందని వారికి అవగాహన ఉంటుందని చెప్పారు. గత కొన్నేళ్లలో పరిస్థితుల్లో కొంత మార్పు వచ్చిందని కూడా ఆయన వెల్లడించారు.
రెండేళ్ల క్రితం జరిగిన సంఘటనల గురించి ఇప్పుడు మాట్లాడుతున్నానని, అయితే అప్పటి నుంచి ఇండస్ట్రీలో చాలా మార్పు వచ్చిందని చెప్పారు. ఇలాంటి ఘటనలు ఇప్పుడు తగ్గుతున్నప్పటికీ, అప్పుడప్పుడు కొందరు తప్పుగా ప్రవర్తిస్తున్నారని పేర్కొన్నారు. ఈ వ్యాఖ్యలు టాలీవుడ్లో మహిళల భద్రత, కొత్తగా ఇండస్ట్రీలోకి వచ్చే అమ్మాయిల పరిస్థితిపై మరోసారి చర్చను రేపాయి.
ఇటీవల కొందరు సినీ ప్రముఖులు తెలుగు అమ్మాయిలు ఎక్కువగా సినిమాల్లోకి రావాలని పిలుపునిస్తున్న నేపథ్యంలో, మరోవైపు మహిళలు ఎదుర్కొనే సమస్యలపై కూడా చర్చ జరుగుతోంది. అవకాశాల పేరుతో వేధింపులు, ఒత్తిడి వంటి అంశాలపై గతంలోనూ పలువురు హీరోయిన్లు ఆరోపణలు చేసిన విషయం తెలిసిందే. ఇప్పుడు జేడీ చక్రవర్తి వ్యాఖ్యలు కూడా అదే చర్చను మరోసారి ముందుకు తెచ్చాయి.
జేడీ చక్రవర్తి నటించిన తాజా చిత్రం గాయపడ్డ సింహంలో తరుణ్ భాస్కర్, ఫరియా అబ్దుల్లా ప్రధాన పాత్రల్లో నటించారు. ఇటీవల విడుదలైన ఈ సినిమాలో ఆయన పాత్రకు ప్రేక్షకుల నుంచి మంచి స్పందన లభిస్తోంది. ప్రస్తుతం ఈ సినిమా థియేటర్లలో ప్రదర్శితమవుతోంది.
Recent Random Post:
